Рет қаралды 28
Ұлыстың ұлы күні - Наурыз мерекесі халқымыздың ежелден желісі үзілмей келе жатқан дәстүрлері мен әдет-ғұрыптары, мәдени және адамгершілік дүниеміздегі қымбат қазыналарымыздың бірі болып саналып келеді. Наурыз мерекесінің тойлануы «Көрісу» күнінен бастау алады. Көрісу - тек адамдардың бір-біріне амандасып, жақсылық тілейтін қауышу мерекесі ғана емес, сондай-ақ жасы үлкендерге ізет көрсетіп, ілтипат білдіретін дәстүрлі көрініс.
14 наурыз күні «РИО» сауда ойын-сауық орталығында Наурыз мейрамының онкүндігінің ашылуы өтті. Онкүндікті Облыстық «Көкшетау» Мәдениет сарайы «Көктем шуағы» атты мерекелік концертімен ашты.
Концерттік бағдарламаға: «Кербез сұлу» халықтық фольклорлық ансамблі (жетекшісі Дәурен Біржанов), «Шалқыма» халықтық би ансамблі (жетекшісі Гүлжан Болат), халықтық ардагерлер хорының қазақ вокалдық тобы (жетекшісі Светлана Пушкина), «Балдәурен» үлгілі вокалды-хореографиялық ансамблі (жетекшісі Айымгүл Хасенова), «Көркемтау» домбырашылар ансамблі (жетекшісі Альбина Қасенова), солистер: Алтыншаш Шукубаева, Айымгүл Хасенова, Ақниет Абдулла қатысты.
Концерт барысында көрермендерге қазақтың ұлттық тағамы - бауырсақтар ұсынылды.
Ақмола облысының мәдениет басқармасының басшысы Айгүл Сәбитованың атынан өнер мен мәдениетті дамытуға, халық шығармашылығын насихаттауға қосқан үлесі үшін «Кербез сұлу» халықтық фольклорлық ансамблі Алғыс хатпен марапатталды.
Көктем сіздерді өзінің жылуымен қуантсын, ал Наурыз әрбір үйге гүлдену мен құт-береке әкеліп, жоспарларыңыздың табысты іске асырылуына сенім сыйласын. Әр үйге, әр отбасына бейбітшілік пен келісім, денсаулық, бақыт пен береке тілейміз!