الباكالوريا في الجزائر مشي مجرد عام دراسي وفوت كيما باقي سنوات نونونو
هذا عام مصيري صح بصح فنفس لوقت امتحان عادي الشعب تاعنا رجعو اوفررايتد نفخوه
لعفسة لي لقيتها صعيبة سيك
حنا موالفين نقراو فصل نستريحو خمسطاعش يوم وفصل ثاني كيفكيف عطلة
بصح فلباك نونونو مكان ني استراحة ني عطلة ني والو تقرا عام كامل وخايف متلحقش فدروس والحاجة الاكيدة انو مستحيل اي بنادم يقدر يختم البروقرام في كل المواد بنسبة 100٪ بصح فنفس لوقت لازم تسعى ليها المهم راح نقسم العام هذا لطروا بارتي اساسين مريت بيهم انا شخصيا
واحد
المرحلة لأولى: حماس البدايات
كأي تلميذ دخلت متحمس كان عندي باك لتس قووو
دخول مدرسي اجواء السبتمبرية جو تع قراية وادوات مدرسية
نشفا ليوم الاول رحت ليسي براسي الاصلع هذاك كان مزال شوية، سخانة
مي انتيك
تلاقيت بقاع صحابي لي قريت معاهم فدوزياماني.. نفس لكلاصة مقسموناش كيما موالف
وشوية معاودين
كنا قريب 50 واحد فلكلاصة💀💀💀
نشفا، شيخة تع عربية قالتلنا منعاملكمش على انكم تلاميذ نعاملكم كأنكم طلاب خلاص بقالكم عام وتروحو لجامعه
زعمى تسيي تقوللنا راكم كبار مكلاه لعب الذر والجياحة بطريقة غير مباشرة
بصح حنا والو
تسمع غير لهدرة ضحك تسمخير نقعدو طابلة لخرة شغل معندناش باك
كملنا فالحالة هذي حتى اكتوبر نوفمبر هكاك.. لغيابات مكانوش بزاف..
ايا و نشفا شيخة تع اونجلي ههههههه كانت جديدة فليسي هبلناها مسكينة ولات تعيط تقوللنا منقدرش نقريكم مي نتوما مشي عباد قااااع وتقوللنا كلاصة لي قدامكم خير منكم
ايا انا عندي صاحبي يقرا لتم
كي سقسيتو
قالي مم حنا تقوللنا نتوما اسوء قسم ومشي تع قرايا
ياودي خرجناها من عقلها الله غالب مشكل مشي فينا حنا كنا غاشي لوكان نتنفسو كامل فنفس لوقت نديرو فوضى ايا لحقو
لفرووووض ااااه لفوروض كانو اول صدمة اول كف خديتو هذاك لعام
ثقبونا لدرجة مكاش لي يدي فوق لمعدل
تعرفو هذاك شعور تع تكون موالف تدي غير ب17 و18 فلسيام امبعد تطلع بروميار ليسي تهبط ل12و13 امالا خليني نقولك بلب فترمينال راح تولي تدي غير ب، 8 - 9
مي نرمال شغل هنا كان اول استعمال لجملة " الصح فالباك "الجملة لي نصبرو بيها رواحنا ايا معليش زادو مشاو، شوية ليامات مزالنا نتمسخرو ونضحكو
انا منكذبش كنت نقرا شوية فدار وشوية ليكور كيما كل عام انا مشي من النوع لي ميقراش قاع
بين الخباشين وجماعة اخر صف تلقاوني فنص شوية منا شوية منا
لحق ديسمبر شهر لاختبارات ونهاية اطول فصل" الفصل الاول"
كل واحد موجد روحو يشوف نيفو تاعو وين راه يدور اببري
سمانة تع ليكومبو منكذبش عليكم.. ثاني جازت غير تحراش نخرجو نبداو نشكو وشنو هذو لي سوجي
هي بيناتنا اختبارات يصعبوهوم بزاف
حتى لوقت ميكفيش
‏نمدلكم هذي
نهار درنا تصحيح تع رياضيات
زوج سوايع مكفاوناش نكتبو تصحيح
‏ننقلوه مسبورة
‏
كيفاااش شيخة حايبتنا نحلوه فزوج سوايع
وكي بدات توزع فنقاط الكااارثية
بدات ديرلنا فدراما تقوللنا لوكان تكملو هكا متجيبوش لباك وهذي كارثة انا قريتكم هكا ههنننن لعلامات تسمع غير 0.25 نص زوج بربلام حنا ميتين بضحك
انا ديت ستة حسيت روحي شيكووور💀
اوكييي هذا كان الكف دوزيام لي كان هدف تاعو انو يفطننا باش نبداو نقراو
بصح حنا لالا مزالنا نصبرو روحنا بجملة "الصح فالبااك"
عطلة تع فصل لول خمسطاعش يوم ناس يستناو لعطلة باش يرتاحو، يلعبو
غير حنا نستناوها نعوضو روطار لي كنا فيه
انا كيفكيف قريت شوية فدار شوية فليكور
وشووية نشوف ليسيري شوية
حتى اني كنت نخدم لفيديو ريلز ونحطهم فانسطا لياسوو تلقاو لتما شوية حكايات جانبية تع لهربة لي صراو فهذاك لفصل🤣
اوكي ضكا المرحلة دوزيام: مرحلة ضياع وفقدان الامل
كانت فلفصل الثاني وثالث
تقريبا قاع لي جوزو لباك متفقين بلي لفترة من جانفي حتى افريل متحسلهاش كامل يجوزو سمانات شهور بلا متفيق
الاجواء الباردة والمغيمة الشتا كنا بدينا ننحو شوية يامات من جدول توقيت 🤣🤣 كيما خميس عشية عندنا مواد ثانوية فلسفة وفرونسي هذو قاع شغل شحمة زايدة لحد عشية كيفكيف قاع موليناش ندخلولهم
ومم كي نروحو زعمة صبح على لعشرة هرووب
على الثلاثة ونص هوووروووب
شيخ لي نشوفوه ميعرفش يفهم مكلاه ندخلو عندو
حتى ولاو يغلقو لباب بلكادنة
لي يجي لليسي ميخرجش
شغل حبس
وعلابيها لغيابات زادو ولينا 30 - 20 واحد فكلاصة هكاك
وكيفكيف اختبارات فصل ثاني خبطونا بطريحة واعرة وحنا نخرجو نضحكو ولايهمنا قاع لأنو "الصح فالباك"
انا كان اول مرة فحياتي نخلي ورقة تع اختبار فارغة حرفيا بيضة
كانت تع فيلو
هي خلاص مكانش عندي وقت نراجع مقالات سماا غير بدينا نجوزو زوج دقايق خرجت مشي غير انا كامل لي جوزو هكا
مكان لا نصف لوقت لا تحليل النص لا والو
ههههههههه والله غير احساس هاايل تخرج تمشي شغل سيجما
ايا عطلة فصل ثاني وقيل جات فرمضان
انا فرمضان كنت خلاص بديت نفشل بديت نكره شغل تتحس روحك حاصل فنص متعرف تراجع دروس لقدم ولا تقرا دروس جدد امالا رمضان هذاك قاع تقريبا مقريت فيه والو جاتني نوبة فقدان الشغف منقدر ندير والو
والسبب انو انا كنت ندير سبور حبسو
تيليفون كان يديلي بزاف لوقت حبستو
صحابي لي كنت نتلاقا بيهم فليسي موليتش نتلاقا بيهم
ونقعد فدار مقابل ربعة حيوط
ومن هذا لممبر خاوتي لي عندو لباك
متغلقش على روحك حافظ على لمورال تاعك اخرج برا قسر صلي دير سبور اضحك باش
هذا يمدلك طاقة باش تتحمل وتكمل
انا لحاجة لوحيدة لي عاونتني انو كان لجامع قدام دارنا