Қызылорда облысында 500-ден аса үлескер шаруа қожалығының төрағасынан өздеріне тиесілі жер телімдерін қайтара алмай жүр. Тіпті төраға орнынан кетсін деген талаптарын да сот қанағаттандырмай қойған. Енді жүздеген тұрғын бір жақ, төраға бір жақ болған мәселе қазір бітіспес дауға айналған. Амалдары қалмаған ауылдықтар кімнен көмек сұрарын білмей әлек.
Шіркейлі ауылындағы жеті айдан бері жерін даулаған жүзден аса үлескер тағы да жиналды. Халықтың тек екі талабы бар. Біріншісі қожалықтың төрағасы орнынан кетсін немесе 500-ден аса үлескерге тиесілі 3 мың гектар жерді қайтарып берсін дейді. Айтуларынша төраға сайланғалы тұрғындардың өздері жалдамалы жұмысшы болып істейтін қожалықтың шаруасы шатқаяқтаған. Тіпті күріш өсіріп күн көрген көпшіліктің кәсібі кері кетті дейді. Өйткені инвесторға қарыз қожалық басшысы азаматтарға мардымсыз ақы төлейтін болды деп ашулы.
АЙГҮЛ ҚОЖАЕВА, үлескер:
- Мынау қожалықта айлық аз. Жұмысшының жағдайы жасалмаған. Сондықтан да ауылдың жастарының бәрі сыртта жүр. Алдына барған адамды балағаттайды. Сабайды. Біз басшы адамның ондай тәртіпсіздігіне жол бермейміз.
Осы дауды шешу үшін қожалықтың үлескерлері жиналыс өткізген. Төрағаға қарсы екендіктерін білдірген халық қорытындыны сотқа жолдапты. Алайда сот бітім болатын шешім шығармады дейді ауылдықтар. Айтуларынша жиналысқа байланысты дайындалған екі тараптың да хаттамасын заңсыз деп тапқан. Бұл одан сайын көпшіліктің ашуын тудырған.
НҰРСҰЛТАН ШАМАХАНОВ, үлескер:
- Лауазымды қызметкерлердің бәріне шағымданып болдық. Сот арқылы шешіледі деп еді. Кеше 20-сы күні сот болып еді шешілмей қалды. Үш күнде шаруашылықтың директорын тауып аламыз да онымен сөйлесіп мына мәселені шешіп береміз деген. Бүгін үшінші күн болды әлі жоқ. Я облыс әкімі жоқ. Я орынбасарлары жоқ.
Үлескерлер таба алмай жүрген шаруа қожалығының төрағасынан сұхбат алу мүмкін болмады. Ал әкімдік өкілдері қазір тек тұрғындарға түсіндірме жұмысын жүргізумен шектеліп отыр. Дауды шешу қолдарынан келмейтінін өздері де мойындайды.
ТАЛҒАТ НҰРТАЗАЕВ, Сырдария ауданы әкімінің орынбасары:
- Соттың шешіміне сәйкес екі жақтың да хаттамасының күші жойылды. Яғни жарамсыз. Әкімдік тарапынан, облыс әкімі тарапынан түсіндірме жұмыстары жүргізілген болатын. Біздің әкімдік тарапынан тікелей шаруашылықтың жалпы жиналыс өткізуге біз әсер ете алмаймыз. Себебі заңда бізге ондай құзырет берілмеген.
Тұрғындар бұған дейін өткізілген жалпы жиналыс та дауға нүкте болмады дейді. Сондықтан ауылдықтар енді арызымызды үкіметтегілерге барып айтудан басқа амалымыз қалмады деп отыр.
Бізді әлеуметтік желіде оқыңыздар:
Информбюро 31 / @informburo31kanal
Informburo kz / @informburokz2022
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал