Бәріңізге ассалаумағаликум. Алматы- аты ашық, заты жабық әкімдіктер қаласы. «Хабар 24» телеарнасының тілшісі Алматыдағы Алатау ауданының әкімдігін сотқа бермекші. Журналист Ақбөпе Тәңірбергеннің бұл қадамға баруына өзін әкімдік ғимаратына кіргізбей, күзетшінің сыртқа лақша бақыртып, лақтырып тастағаны себеп болған.
Еркекпісің, әйелмісің деп қарамайтын бұл неқылған күш, неқылған күзетші? Әлде кім болса, о болсын тілші біткенді осылай тырқыратып қуып шық деп бұйрық берген әкімнің өзі ме? Әкімдік журналистті, журналист әкімдікті кінәлап отыр. Кімдікі дұрыс, кімдікі бұрыс? Кәсіби міндетін атқаруға келген БАҚ өкілі соншама не бүлдіріп қойған? Ақпарат министрі Аида Балаева кімді жақтайды, әкімдікті ме, тілшіні ме? Жалпы Қазақстанда кәсіби міндеттерін атқаруда ең көп кедергіге ұшырайтын, тіпті таяқ жеп соққыға жығылатын арна тілшілері қайсы? Мұны сізге білген дұрыс!
Қазақстан-қызықстан. Мемлекеттік телеарнаның тілшісін мемлекеттік мекемеге кіргізбей сыртқа лақтырып жіберді. Желідегі біреу айтпақшы «Аймақтағы әкімдер қой сойып күтіп алатын «Хабардан» да қадір қашты ау.
Елестетіңізші егер бұл журналист қыздың орнында 31, ктк, азаттық арналарының қызметкерлері болса сонда не болмақ?! Әлгі күші асып-тасып тұрған күзетші мына түрімен оларды соққыға жығудан тайынбайды ау. Енді оқиға қалай болғаны туралы әңгімелейік. Хабар 24 арнасының тілшісі Ақбөпе Тәңірбергеннің айтуынша ол таңертеңгісін халықтан жергілікті проблемаларға қатысты сұхбат алып, сол мәселелер бойынша жауап алу үшін әкімдікке барған. Бірақ аудан басшысы орнында жоқ екен. Қызметкерлер әкім далада жүр депті. Далада жүрген жерінен сұхбат алайын десе, оған да қарсы болып, әкімнің кешкі бес жарымда жұмыс орнына келетінін айтыпты. Содан тілші қыз сол уақытқа дейін әлгі деловой әкімді күтіпті. Бір кезде Аппарат басшысы шығып, әкімнің әлі келмегенін айтыпты. Сосын журналист тым болмағанда орынбасарлары шығып, сұхбат беруін сұраған. Аппарат басшысы болса ішке кіріп қайта шықпай қойыпты. Соңында күші асып-тасып тұрған күзетшіге тап болған.
«Сен - әкімдік пен халық арасындағы көпірсің» дедіңіздер. Мен желпілдеп, жетіп бардым. Әкімдік болса, сіздердің «көпірлеріңізді» далаға лақтырып жіберді. Бітті. Алматы қаласы Алатау ауданындағы әкімдіктен мәңгі естелік», - деп жазды Ақбөпе Тәңірберген әлеуметтік желідегі парақшасында.
Ең қызығы әкімдік өздеріне грам шаң жуытпай отыр. Оқиғаға байланысты олардың айтқаны мынадай. «карантин шектеулеріне байланысты Алатау ауданы әкімдігінің ғимаратына кіру шектелген және Ashyq қосымшасы бойынша жүзеге асырылады. Журналист Ақбота Тәңірберген болса оператормен бірге ғимаратқа қосымшадағы өз мәртебесін сканерлемей, турникеттің астымен өткен, бұл туралы тиісті бейнежазба бар».
Әкімдіктегілердің сөзінше, БАҚ өкілдері күзет қызметі қызметкерлерінің ескертуіне жауап бермей, жанжалды шығарыпты.
ЗКТ: Тілшіні сонша күткізіп, соңында не төбе көрсетпей қойған бұл қай әкім? Қоғамның назарына іліккен бұл әкімнің аты Азамат Қалдыбеков. 36 жаста, Тараз қаласының тумасы. 2020 жылдың қаңтарынан бері Алматы қаласы Алатау ауданының әкімі болып жұмыс істейді.
«Охрана деген кәсіп бар, тілшіні лақша лақтырған». Ақбөпе Тәңірберген оқиға орнына келген полицияға арыз жазыпты. Журналист жұмыс істейтін арнаның басшысы да «Журналистік қызметке кедергі келтіргені үшін телеарна полицияға арызданады», - деп мәлімдеді. Ал Ақбөпенің өзі әкімдіктің кешірім сұрамағанын, хабарласпағанын жеткізді. «Мені әу баста кіргізу ойларында болмаған, сондықтан ешкім менен ашықты көрсет деп сұраған да жоқ. Маған бір секунтымды қиып, көрсете салу түк қиын емес, Ақталған жақсы ғой, көпшіліктің алдында» деп жазды ол парақшасында.