mtisambebi.ge/ - „დენი ყველა სოფელს ექნებაო, სულ ეგ მესმოდა. გვეგონა, რომ ერთხელაც მოიცლიდნენ ჩვენთვის. კაი ყოფას ვინ გაექცევა, დაიცალა სოფლები. თუ რამე ზომები არ იქნება მიღებული, მეც ვეღარ შევძლებ მომავალი წლიდან აქ ყოფნას“, - მზია ჭინჭარაული, ხევსურეთი, სოფელი ღული.
„ორნიშნა ეკონომიკური ზრდისა“ და „სიღარიბის ისტორიულ მინიმუმზე დაყვანის“ მიუხედავად, ხევსურეთის 20-ზე მეტ სოფელში ხალხი ლამფის შუქზე ცხოვრობს. რამდენიმე დღის წინ, ხევსურებმა აქცია გამართეს და შატილის გზა გადაკეტეს. მთავრობამ ორჯერ მეტი პოლიციელი გაგზავნა, ვიდრე აქციის მონაწილეები იყვნენ. უშუქობა ხევსურეთის სოფლების გაუკაცრიელების ერთ-ერთი მთავარი მიზეზია.
უშუქო სოფლებში, მოსახლეობა სოფლის დახმარების პროგრამით გამოყოფილი მცირეოდენი თანხების ხარჯვას, წელსაც, მზის ბატარეების შესაძენად ან ელექტროენერგიის გადამცემი ქსელის მოსაწყობად ითხოვდა, ადგილობრივმა ხელისუფლებამ კი მათ საქანელებისა და სკვერების მოწყობა შესთავაზა.
„მთის ამბები“ ვიდეომასალას ხევსურეთის ყველა უშუქო სოფლიდან შემოგთავაზებთ.