Рет қаралды 118,265
Нұр-Сұлтанда әлем бойынша коронавирустың ең қауіпті мутацияланған түрлерінің бірі - үнді штамын жұқтырған 30 адам анықталды. Ковидтің бұл түрімен науқастанған адамның буыны мен іші қатты ауырып, жүрегі айнып лоқсиды екен. Тіпті, науқастың құлағы естімей, аяқтың микротромбозына әкеп соқтыруы мүмкін. Өзге штамдарға қарағанда 60 пайызға тез жұғатын ауруды дер кезінде алдын алу үшін Қазақстанда карантиндік шектеулер қайта күшейтілуі мүмкін.
Қазақстанда бірнеше айдан бері ковидтің таралуы бойынша "қызыл" аймақтан шыға алмай отырған Нұр-Сұлтанда жағдай одан сайын өрши түсті. Ал сынама нәтижесі 54 науқастың 30-ында, яғни вирус жұқтырғандардың 56 пайызында Үнді штаммының бар екенін көрсеткен. Олардың алтауы Ресей, Ауғаныстан, Түркістан, Ақмола облысы мен Шығыс Қазақстан облыстарынан келген адамдардан табылған. Қауіпті ауру 7 күнде тарап, бір науқастан 5-6 адамға бірден жұғуы мүмкін.
АЛЕКСЕЙ ЦОЙ, ҚР Денсаулық сақтау министрі:
- Дүниежүзілік Денсаулық сақтау ұйымының мәліметі бойынша, дельта штамм әлемнің 174 елінде анықталған. Өзге мутацияға қарағанда 60 пайызға тез тарайтын вирустың бұл түрінен өлім-жітім көп болуы мүмкін. Дельта штамм британдық штаммға қарағанда екі есе жұқпалы.
Коронавирустың Үндістанды жайпап өткен түрін ауыздықтау үшін Қазақстан үкіметі шұғыл түрде елімізде карантиндік шектеулерін күшейтпек. Қазірдің өзінде Нұр-Сұлтандағы сауда және ойын-сауық орталықтары демалыс күндері жұмыс істемейді, ал апта ортасында бұл ғимараттар тек 17.00-ге дейін ғана ашық болады. Жабық ғимаратта орналасқан және "Ашық" жобасына қатыспайтын қоғамдық тамақтану орындарының жұмысы таңғы жетіден кешкі сегізге дейін шектелді. Ал сыртта орналасқан тамақтану орындарына кешкі 22.00-ге дейін жұмыс істеуге рұқсат берілді. Жабық базарлар да демалыс күндері істемейді. Ашық аспан астында 100 адамнан аспайтын жиын өткізуге ғана рұқсат етілді.
ЕРАЛЫ ТОҒЖАНОВ, ҚР Премьер министрінің орынбасары:
- Өңір әкімдерінен эпидахуалды күшейтуді сұраймыз. Босаңсуға ешқандай негіз жоқ. Барлық әкімдер адамдар көптеп жиналатын орындарда, әсіресе демалыс орындарында санитарлық талаптардың, әлеуметтік қашықтықтың, санитарлық режимнің қатаң сақталуына басты назар аударуы тиіс. Үшіншіден барлық өңірлерде мониторингтік топтардың жұмысы күшейтілуі қажет.
Алайда Денсаулық сақтау министрі бір апта бұрын өткен жиында ковидтің кез келген мутациясына тойтарыс беруге сақадай саймыз деген болатын. Ал үнді штаммының таралуын тоқтату үшін жаппай вакцина алу керек деп отыр үкімет басындағылар. Бүгін Премьер министр Асқар Мәмин өңір әкімдеріне аймақтардағы түсіндірме жұмыстарын жеделдету керектігі туралы тапсырма берді.
Гүлназ Сайлауқызы, Нұркен Тоқмурзин
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Дельта #жаңа_штамм #коронавирус #эпидемия