Рет қаралды 139,529
Qəhrəmanımız müxtəlif növ nəsli kəsilməkdə olan quşları həyətində bəsləyən Lənkəran sakinidir. Hətta onun təsərrüfatında adı qırmızı kitaba düşən quşlar da var.
Tovuzquşu, flaminqo, qırqovul, mandarinka, karalinka, sultan toyuğu, slavyana qırqovulu... Buranı kiçik quş parkı da adlandırmaq olar. Lənkəranlı Mirabbas dayı illərdir bu quşları bəsləməklə məşğuldur. Mehrini-məhəbbətini quşlara salaraq onlarla nəfəs alan Mirabbas Abbasov Lənkəran rayonunun Liman şəhərində yaşayır. Burada dünyanın bir çox ölkələrindən gətirilən quşlara rast gəlmək mümkündür.
Quşbaz Mirabbas Abbasov: “Flaminqonu mən gətirmişəm Ukraynadan, Bildirçinin ən balacası 50 qramdır. O da Hindistandan gəlib. Amma böyük bildirçinlər Amerikadandır.”
Mirabbas dayının kiçik zooparkında 300-ə yaxın 30 növdə müxtəlif cinsli quşlar var. Təsərrüfat sahibi quşların bəslənilməsinə xüsusi diqqət göstərir. O, gün ərzində 30 kq-a yaxın yemdən istifadə edir.
Quşbaz Mirabbas Abbasov: “Çoxu gicitkən verirəm, qənaət oldun buğdaya deyə. Həm də o xeyirlidir quşa. Tərkibində hansı vitamini istəsən var.”
Quşları görmək, onlarla tanış olmaq üçün təkcə Lənkərandan, ətraf rayonlardan deyil, eyni zamanda respublikanın hər bir bölgəsindən qonaqlar gəlir. Qəhrəmanımızın ən böyük arzusu zoopark yaratmaqdır.
Quşbaz Mirabbas Abbasov: “Gələcəkdə zoopark olsa Lənkəranda yaxşı olar. Buralar abadlaşır, turistlər gəlir.”
Həvəskar quşbaz eyni zamanda uzun illərdir quşların tədqiqatı aparır. Dünyanın bir sıra ölkələrində Yaponiya, Kanada, İspaniya, Rusiya, İndoneziya və bir çox ölkələrdə flora və fauna ilə bağlı seminar və konfranslarda iştirak edib. Mirabbas dayının zooparkında adı qırmızı kitaba düşən quşlara da rast gəlinir.