2024 年 5 月 9 日．星期四
曾幾何時，香港同新加坡就好似一對競爭對手。但近年我發現，新加坡人直頭覺得對香港比較係一種侮辱，同時香港亦唔少朋友覺得，香港政府真係連「人哋嘅尾燈都見唔到」。
作為一個香港人，我難免有種恨鐵不成鋼嘅感覺。甚至乎，恨鐵不成鋼都唔足以形容呢份鬱結。我甚至乎有時係嬲到想喊，就好似自己一直以來支持嘅球隊，畀人數 42 比 0 個種悲憤。
究竟，新加坡人係點睇呢個世界？更正確咁講，新加坡政府同佢哋嘅人民行動黨，想新加坡點睇呢個世界？下星期，黃循財將會就任成為新加坡總理。我亦都借呢個機會，同大家重溫兩段黃循財以副總理身分嘅發言，了解吓呢個地方，人哋嘅文化、價值觀，同埋反省吓人哋有啲乜嘢值得學習嘅地方。