Рет қаралды 320,808
Мүгедек, соғыс ардагерлері мен жұмысқа жарамсыз жандардың несиесі кешірілуі мүмкін. Бүгін Мәжіліс «Коллекторлық қызмет туралы» заң жобасын қарады.
Үтір, нүктеге дейін мән беріп, әрбір бабына тоқталды. Адам құқығына қайшы келетін әрекеттерді анықтады. Коллектор қызметін мүлдем тоқтату ұсынысы да айтылды.
«Антихалықтық» заң. Депутаттар коллекторлық қызмет туралы құжатты осылай атаған.
Қарызды қағып алушылардың міндетін ешкім де жарата қойған жоқ әу бастан-ақ. Рэкетшіл, мафияға ұқсайды деді.
Әйтеуір азаматтардың құқығын бұзған солақай тірліктің біріне балады.
Ал бүгін Ұлттық банк ол заңды ретке келтіріп, Мәжіліске қайта әкелді. Бұл жолы көп өзгерген. Әсіресе әлеуметтік топқа енетін бірқатар азаматтарға ақжолтай жаңалығы да бар.
Олег Смоляков, ҚР Ұлттық банк төрағасының орынбасары
-Мүгедектер, соғыс ардагерлері, зейнеткерлер мен жұмысқа жарамсыз жандарға банк кешірім беруді қарастырып отыр. Өйткені олардың борышты өтеуге ешқандай мүмкіндігі болмағандықтан, қинамауды жөн санап отырмыз. Олардың ісін де коллекторларға бермейтін боламыз.
Елде несие алғандар саны 5 млн. асады. 1 млн-ға жуығы оны уақытылы төлеуге қауқарсыз болып отыр. Күнімді көремін, бала-шағамды асыраймын деп қарыз болғандар бар. Жолы болмай, ісі өнбегендер бар арасында. Ондайларға да қол ұшын беру қажеттілігі айтылды.
Мансұрхан Махамбетов, ҚР Парламенті Мәжілісінің депутаты
-Әртүрлі жағдайлар орын алып жатады. Кейде несие алып, банкротқа ұшырап жатқандар бар. Менің ойымша оларға да банк кешіріммен қарауы тиіс.
Коллекторлық қызметті мүлдем алып тастау қажет деген пікірлер де болды. Халыққа қысым жасап, өктемдігін жүргізетін мемлекеттік мекеме емес деді көбісі.
Асхат Рахымжанов, ЖСДП мүшесі
-Біз халықты қорғау жағын ойлауымыз қажет. Сондытан коллекторлық компаниялардың қызметін тоқтатуымыз керек. Ол үшін бізде сот, прокуратура, ішкі істер департаменттері сияқты құзырлы органдар бар.
Заңды аударып, ақтарып шыққандар нормалар бір жүйеге келтірілсе, дұрыс құжатқа айналатынына сенді. Бірақ жауапкершілік жайы аз қамтылған көрінеді.
Бақтияр Галимжанов, «Қазақстанда Парламентаризмді дамыту» қорының өкілі
-Нормалар жақсы. Бірақ олардың орындалуын кім қадағалайды? Заңды бұзған компанияларға қандай жаза қолданылады?
Бұл талқылаулар мен ұсыныстар әзірге комитет аясында ғана болып жатыр. Мұндай басқосулар әлі бірнеше рет болады деген жоспар бар. Келесі жолы кездескенше айтылғандардың барлығы жобаға енетін болды.
Эльвира Тағайқызы, тілші
-Осы күндері несиесіз өмір - несіне өмір деп әзілдеп жататындар көп. Қарыз алуды парызбен теңестіретіндер тағы бар. Борышкерлер қаптап жүр. Бірақ оны сәтімен өтеушілер аз. Көрші елдерде бұл үлкен проблема. Отбасымен көшеде қалып, тіпті психикалық ауруға шалдығып жатқандар бар. Ал біздің мамандар осының алдын алмақшы. Тіпті несиенің тең жартысын төлеп беруге дейін бар. Мәселенің қалай шешілетіні уақыт еншісінде.
Авторлары: Эльвира Тағайқызы, Қанат Әбілдин