Рет қаралды 6,394
یہ ایک کورس ہے مدارس کے طلباء اور ان لوگوں کے لئے ہے جو اردو لکھنا اور پڑھنا جانتے ہیں.
یہ کورس مدارس کے طلباء کے لئے شروع کیا گیا ہے. اس میں انگلش زبان کے ہر طرح کے جملے بنانا سکھایا جائیگا کہ یہ کیسے بنتا ہے. کورس کے بعد آپ ان شاء اللہ انگلش میں اپنا، اپنے دین، اپنے انبیاء اور الله کا تعارف کراسکتے ہیں, بات کر سکتے ہیں, کہانی لکھ اور پڑھ سکتے ہیں.
اس کورس کو مکمل کرنے کے بعد ان شاءالله آپ کہانی لکھ اور پڑھ سکتے ہیں۔ اپنا، اپنے دین، انبیاء اور معبود کا اچھے انداز میں تعارف کراسکتے ہیں۔
سنہرا موقع ہے۔ آسان اسلوب میں عربی اصطلاحات میں انلگش بولنا سیکھیں۔ زیادہ سے زیادہ اسے شیئر کریں۔
کورس کے محرکات و مقاصد
مدارس کے اکثر طلباء یہی سمجھتے ہیں کہ انگلش زبان بہت مشکل ہے۔ دراصل یہ بہت آسان زبان ہے۔ اسے ہم نے، ہمارے مدارس کے انتظامیہ نے مشکل بنا دیا ہے صرف اس وجہ سے کہ یہ انگریزوں کی زبان ہے۔ بعض مدارس میں یہ زبان یا تو نصاب میں شامل ہی نہیں ہے یا پھر اگر شامل ہے تو سب سے کم وقت اسی زبان کو دیا جاتا ہے یا پھر طلباء اسے سیکھنے میں خود کوتاہی کرتے ہیں جبکہ فراغت کے بعد ہمیں اسی زبان سے واسطہ پڑتا ہے۔
ہم یہ بات بخوبی جانتے ہیں کہ اسی زبان کے ذریعے آج مسلم نوجوان لڑکے اور لڑکیاں گمراہ ہورہے ہیں۔ انکی طرز زندگی بدل رہی ہے۔ اسلام سے بدگمان ہورہے ہیں۔
ہر دن سوشل میڈیا پر انگلش زبان میں کوئی نہ کوئی فلم، کتاب یا میگزین ہمارے دین، تہذیب، انبیاء اور اسلامی اقدار کے خلاف ریلیز ہوتی رہتی ہیں اور مسلمان شوق کے ساتھ دیکھتے اور پڑھتے بھی ہیں لیکن ہم کو اسکی خبر نہیں رہتی ہے، کیوں کہ ہم وہ زبان نہیں جانتے ہیں جو عوام جانتی ہے۔
اگر ہم یہ سوچ رہے ہیں کہ اُردو اور عربی میں تقاریر کرنے اور کتابیں لکھنے سے عوام صحیح راستے پہ آ جائے گی اور دین کا حق ادا ہوجائیگا تو یہ ہماری بھول ہے، کیونکہ عوام اردو اور عربی برائے نام جانتی ہے۔ ہمیں وہ زبان سیکھنی ہوگی جو رائج اور کثیرالاستعمال ہے۔
جتنے قواعد اور گہرائی عربی زبان میں ہے اتنی انگلش میں نہیں ہے۔ جب ہم عربی میں تکلم کر سکتے ہیں تو انگلش کو کیوں نہیں سیکھ سکتے ہیں، لیکن سیکھنے کا حوصلہ ہونا چاہئے۔ انگلش بہت آسان ہے اسے ہم ایک مہینے میں بھی سیکھ سکتے ہیں۔ میں اپنے تجربے سے یہ بات کہہ رہا ہو۔ میں نے چند طلباء کو دو مہینے میں انگلش پرھایا ہے شرط یہ ہیکہ سیکھنے کا شوق ہو۔ یہ زبان مشکل اس وجہ سے لگتی ہے کیونکہ ہم نے اس طرح کی سوچ پیدا کرلی ہے۔ کبھی سیکھنے کی ضرورت محسوس نہیں کی۔ اور جب تک سیکھنے کی ضرورت محسوس ہوتی ہے تب تک وقت بہت آگے نکل چکا ہوتا ہے اور حالات بھی بدل چکے ہوتے ہیں۔ سوائے پشیمانی کے اور کچھ ہاتھ نہیں آتا ہے۔
چونکہ ہم وارثین انبیاء ہیں۔ وارثین انبیاء اور انکے پیروکار ہر میدان عمل میں، زندگی کے ہر محاذ پر پیش پیت ہوتے ہیں۔ اپنی قوم کے لئے باعث فخر اور ہیرو ہوتے ہیں لیکن ہم بالکل مختلف ہیں۔ لوگ ہمیں دوسرے نام اور کام سے جانتے ہیں۔ ہم نے اپنی ایک الگ دنیا بنا لی ہے جس میں صرف ہم ہی سانس لیتے ہیں۔
عوام کے ذہن میں یہ بات راسخ ہوگئی ہے کہ علماء صرف، مدارس، مساجد، تنظیموں، اداروں، خانقاہوں اور چندہ اصولی کے لئے ہیں۔ معاشرہ، تجارت اور پیشے سے انکا کوئی واسطہ نہیں ہے۔ یہ بات ہم نے اپنے قول و عمل سے کسی حد تک ثابت بھی کی ہے۔ ہم نے خود کو کبھی ہیرہ اور موتی بنانے کی کوشش نہیں کی۔
ہمیں فخر ہے کہ ہم مدارس، مساجد اور خانقاہوں کے نگہبان ہیں لیکن اسکے ساتھ ساتھ بہت ذلت و رسوائی ہوتی ہے جب کوئی عالم، وارث انبیاء، دین کا نگہبان، بخاری، ترمذی، مسلم و ابن ماجہ پڑھا ہوا، کرتے پاجامہ میں، چہرہ پر سنت رسول سجائے ہوئے بازار، مارکیٹ یا اسٹیشن پر دوسروں سے فارم اندراج کرنے یا کوئی تحریر پڑھنے کے لئے کہتا ہے، اور سامنے والا حیرت میں سوالیہ نظروں سے معائنہ کرتا ہے کہ جب انکا نبی امی ہوکر ساری دنیا کا معلم بن سکتا ہے، علم کا سمندر ہوسکتا ہے تو انکا پیروکار اتنا محتاج اور سب سے رائج زبان سے بے خبر کیسے ہو سکتا ہے۔ آپ ہی سوچئے کہ دنیا ہمیں کس نظر سے دیکھتی ہوگی کہ ہم نے دین کو کتنا محدود کر لیا ہے اور اس میں صرف ہم ہی رہتے ہیں اور عوام ہم سے دو قدم آگے ہے ۔
میرا خیال ہے کہ یہ وارثین انبیاء کی شان نہیں ہے۔ نبی کا ہر امتی سو کافروں پر بھاری ہوتا ہے۔ حضرت ربعی بن عامر رستم کے دربار میں کھڑے ہر شخص کو خوفزدہ کر دیتے ہیں لیکن آج ہم نو یا دس سال مدارس میں رہ کر، کتابیں پڑھ کر احساس کمتری کے شکار رہتے ہی۔ بیرونی دنیا میں قدم رکھنے سے ڈرتے ہیں ۔
آج انگلش زبان ہر جگہ رائج و غالب ہے۔ عوام اور نئی نسل اسی زبان کو سمجھتی ہے۔ عوام تک ہم اپنی باتیں، تحقیقات، دینی احکام اور انفارمیشن اسی وقت پہنچا سکتے ہیں، اسلام کے خلاف اٹھنے والے سوالات کا جواب اسی وقت دے سکتے ہیں جب ہم اس زبان کو اچھے سے جانتے ہوں۔
ان ساری باتوں کو مد نظر رکھ کر، غور و فکر کرکے اس کورس کو شروع کیا گیا ہے تاکہ شوق رکھنے والے مدارس کے طلباء و طالبات، یا جو فارغ ہوچکے ہیں اور انگلش کو آسان اسلوب میں کم مدت میں سیکھنا چاہتے ہیں، وہ سیکھ سکیں۔
اس کورس کو مکمل کرنے کے بعد ان شاءالله آپ کہانی لکھ اور پڑھ سکتے ہیں۔ اپنا، اپنے دین، انبیاء اور معبود کا اچھے انداز میں تعارف کراسکتے ہیں۔
میری اس تحریرکا ہر گز یہ مطلب نہیں ہے کہ اردو اور عربی کی کوئی اہمیت نہیں ہے یا پھر اسے سیکھنا نہیں چاہئیے ۔ ایک بات عرض کردوں کہ مجھے عربی و انگلش دونوں میں یکساں صلاحیت ہے، لیکن یہ کورس اس لئے شروع کیا ہے کیونکہ کہ مدارس میں اس چیز کی کمی ہے۔ اور اس زبان کو سیکھنا وقت کی ضرورت بن گئی ہے۔
جزاکم اللہ
شعبان علی ندوی