尋日（1）爆出 #柳應廷 #Jer@MIRROR，遭拍拖5年嘅圈外女友 #Kelly unfollow佢嘅 IG，兼且刪除放閃合照，因而引發分手疑雲，事後阿Jer澄清二人只係處於冷戰期，而阿Jer仍舊follow 女友，希望冷戰過後，感情依舊。
今日阿Jer出席活動，雖然受感情問題困擾，但佢話藝人工作，就係任何情況下都不受影響。「藝人遇到乜嘢事都要做嘢，唔會影響到，我同女友關係純粹鬧交，希望可以解決得到，大家畀啲時間同空間我哋處理問題。」問到女友IG unfollow佢，及刪除合照嘅絕情舉動，Jer無奈︰「每個人都有自己處理方法。」
阿Jer稱情侶間有冷戰屬平常︰「冷戰咗幾日，相信每對情侶都會遇到。近排工作忙，陪同屋企、朋友或陪佢時間都冇乜，相信之後會有更好安排。」隨住 #MIRROR 爆紅，排山倒海、日以繼夜嘅工作量，身邊人如何體諒，亦係一門相處學問。
至於呢段冷戰期，彼此有冇保持文字溝通？Jer︰「文字上有溝通過，因為我本身鍾意用文字。大家將呢件事睇得太大，每對情侶都會有紛爭，只不過我哋係藝人，大家就會將呢件事放大。我明白作為公眾人物會畀人討論，但希望大家畀啲空間，大家繼續支持我哋，而私人事唔好多加評論，因為一啲關係只有兩個人最清楚，外界揣測未必正確。（同第三者無關？）冇，絕對係假。」Jer斬釘截鐵。
感情事向來低調，遇上問題佢話冇跟 #花姐及 #MIRROR 兄弟透露半句︰「冇呀，感情事好少同人分享，就算意見都唔會問，因為最清楚係自己，自己可以解決。」即將開騷，Jer有望屆時雨過天青，女友現身捧場，「希望會，希望大家到時見到佢。」
關係睇雙方，呢段感情嘅挽留，阿Jer抱希望︰「5年幾對我嚟講真係……我本身好重視同珍惜嘢嘅人，我都希望呢段感情會好返。（點好返？）次次都唔同，Ian你會用乜嘢方法？」將個波交畀兄弟，接波嘅 #Ian #陳卓賢 話最緊要兩個字︰「真心！每個人做事方法都唔同，真心去做就最好啦。」
兄弟為情所困，咁Ian同女友 #Amy Lo 嘅感情，係穩定還是feel到危機感？Ian︰「冇，事業好重要，大家會體諒同諒解，冇乜話特別擔心呢方面。（另一半同做娛樂圈會較易諒解？)可能有少少關係，大家係同行就知道工作模式，知道可能要花好多時間。」
對於打入商台《 #叱咤 》我最喜愛的男歌手五強，Ian說︰「多謝大家，身體力行支持自己喜愛嘅人係好事，入到五強係好大力量。我冇諗過個人攞獎，當然希望MIRROR攞獎。」
去年阿Jer張樂壇成績表取得佳績，今年信心如何？「自己冇太大慾望，唔會話一定要攞乜獎，歌曲已表達自己想表達嘅嘢。」
#娛壹
請支持訂閱《娛壹》Patreon︰www.patreon.com/posts/59418722
------------------------------------------
即刻跟住Follow 晒我哋Channel：
FB： as1hk.entertainment
IG： as1.entertainment
YT：kzfaq.info/love/gaIJfwFLXQsasrffZt4cEw