Рет қаралды 118,661
Еліміздегі жаппай тәртіпсіздік кезінде күшейтілген режимде күзетте тұрған әскеридің бүлдіршінмен қол алысып тұрған мына суреті көпшіліктің жүрегіне жылу ұялатты. Дәл осы фотоны «Күшіміз бірлікте» деп ұрандатқан жұрт, бейбітшіліктің белгісіне айналдырды. Сурет Шымкенттегі қалалық әкімдік маңында түсірілген. Кезекшілікте тұрған әскериге екі жасар Әлихан жүгіріп барып амандасқан. Сол сәтті жақын маңдағы таспагер кадрға тартып үлгеріпті. Ал бүлдіршіннің ата-анасы суреттің желіге тарап, жұрттың ықыласына бөленетінін білген жоқпыз дейді.
Жетінші қаңтардың қара суық таңы. Елдегі болған бүліктен бейхабар сәби бірер күн бойы үйден шықпаған соң, алаңда асыр салып жүгіріп жүр. Қадам сайын қаптаған әскерилерді көріп, таңсық көрініске таң қалған бүлдіршін автомат асынған арнайы киімдегі әскерилерге барып қол беріп амандасқан. Тура осы сәт кадрға ілініп, «күшіміз бірлікте» деген бейбітшілік символына айналды.
Әлеуметтік желіге тараған бұл суреттің басты кейіпкері - Әлихан Аманжол екі жаста екен. Әкесінің сөзінше, жұрт қаймығып жатқанда көптің көңіліне жылу ұялатқан сәтті ешкім суретке түсіріп алады деп ойламапты. Бүлдіршіннің бұл әрекетіне әулеті мен бала-бақшадағы тәрбиешілерінен бөлек, ел сүйсініп жатыр.
АМАНТАЙ СПАНАЛИЕВ, Әлиханның әкесі:
- Адамдарды еш жатырқамайды. Көрген адамдардың бәрімен мен өзім де үйретемін, үлкен кісілермен амандас деген сияқты. Сол әдетпен бұл жүгіріп барып амандасқан әскери адаммен. Ұлым мен әскери адамның суреті музыкамен әсірелеген кезде көп адамға дем берді деп ойлаймын, қаймығып отырған халықтың еңсесі көтерілді деп ойлаймын.
Ал сәбидің сәлемін қабыл алған Шахрух Хасанов бүлдіршіннің бұл әрекетіне өзім де тәнті болдым дейді. 6698 әскери бөлімінің бақылаушы маманы 3 күн бойы алаңда ел тыныштығын торуылдап тұрған екен. Бірер күннен бері үй бетін көрмеген екі баланың әкесі, кішкентай Әлиханның қолын беріп, амандасуы басқаша әсер қалдырды дейді.
ШАХРУХ ХАСАНОВ, ҚР Ұлттық ұланы 6698 әскери бөлімінің ефрейторы:
- Күнде қару-жарақпен, олай тұрғанымызды көрмегеннен кейін жүрек жұтып, адамдар арасынан жүгіріп келіп, қолын созғаннан кейін менің де жүрегім езіліп, жас баланың қолын қайтармай, амандастым. Ол суреттің түсірілгенін мен де байқамадым. Ол жерде бізге мүмкін емес олай суретке түсу.
Сөйтіп, әскери мен сәбидің бір-бірімен қол берісіп, амандасу сәті қазір «Күшіміз бірлікте» деген хэштегпен бейбітшілік белгісіне айналып отыр. Бүлікшілердің бүлдіруінен жүректі қорқыныш емес, уайым билеген сәтте ел үшін қайратын қайраған қызметкерлерді осы бір сурет қанаттандырды дейді қалың қауым.
Мақсат Жақсыбайұлы
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#КүшімізБірлікте #бейбітшілік