လက်ရှိ စစ်ရေး အခြေအနေတွေကိုကြည့်ရင် မြန်မာ စစ်တပ်ဟာ စစ်မြေပြင်မှာ ရှုံးပွဲတွေ ဆက်တိုက် ကြုံလာရပြီး၊ တိုင်းပြည်နယ်နမိတ် ပတ်ချာလည် နယ်မြေ အတော်များများကို တိုတောင်းတဲ့ အချိန်ကာလ အတွင်းမှာပဲ လက်လွှတ် ဆုံးရှုံး သွားခဲ့ပါတယ်။
တိုင်းရင်းသား လက်နက်ကိုင်း အဖွဲ့တွေဟာ သူတို့ရဲ့ သက်ဆိုင်ရာ နယ်မြေဒေသ အသီးသီးမှာ ကိုယ်စီ အပိုင်းလိုက် အပိုင်းလိုက် ထိန်းချုပ် စိုးမိုးလာကြပါတယ်။ အုပ်ချုပ်ရေး ယန္တရားတွေပါ ထူထောင်ကြပါတယ်။ အခုလိုမျိုး စစ်ရေးနည်းနာနဲ့ ရယူထားကြတဲ့ တိုင်းရင်းသား မျိုးနွယ်စုတွေ အလိုက် ကိုယ်ပိုင် စီမံ ခန့်ခွဲ အုပ်ချုပ်ကြတဲ့ နယ်မြေတွေ ကျယ်ပြန့် ပေါ်ထွန်းလာတဲ့ အခြေအနေအပေါ် ဘယ်လို အဓိပ္ပာယ်ဖွင့် နားလည်နိုင်ပါသလဲ ....
ဒါဟာ ပြည်ထောင်စု ပုံစံသစ်တစ်ခုဆီကို ဦးတည်နေတာလား ... ဒါမှမဟုတ် တိုင်းပြည် အစိတ်စိတ် အပိုင်းပိုင်း ဖြစ်လာတော့မယ့် ကနဦး အခြေအနေမျိုးလား .... စတာတွေ အပေါ် သုံးသပ်ရင်းမှာပဲ နေပြည်တော် စစ်ကောင်စီ၊ NUG နဲ့ တိုင်းရင်းသား လက်နက်ကိုင် အဖွဲ့တွေရဲ့ ရပ်တည်မှု အခြေအနေတွေ အကြောင်း ဒီတစ်ပတ် အသေးစိတ် ဆွေးနွေးသွားဖို့ ရှိပါတယ်။
ဒီတစ်ပတ် ပါဝင် ဆွေးနွေးကြသူတွေကတော့ .... နိုင်ငံတကာ ပဋိပက္ခတွေကို ဖြေရှင်းနိုင်ရေး နည်းလမ်းတွေ အကြံပြုဖို့ရာ ဖွဲ့စည်းထားတဲ့ ဘရပ်ဆဲလ်စ်မြို့ အခြေစိုက် International Crisis Group အဖွဲ့က မြန်မာ့အရေး အကြီးတန်း အကြံပေး ရစ်ချက်ဟော်ဆီနဲ့၊ မြန်မာနိုင်ငံရဲ့ တိုင်းရင်းသားလက်နက်ကိုင် အဖွဲ့တွေ အကြောင်း အထူးပြုလေ့လာသူ ယူကေနိုင်ငံ ဆပ်ဆက်စ်တက္ကသိုလ်က အကြီးတန်း ကထိက ဒေါက်တာ ဒေးဗစ် ဘရင်နာတို့ ဖြစ်ပါတယ်။
ဘီဘီစီသတင်းထောက် ကိုဝေဖြိုး စီစဥ် တင်ဆက်ထားပါတယ်။ #ဘီဘီစီမြန်မာပိုင်း #သတင်းမြင်ကွင်း