МӘҢГІЛІК ЕЛДІҢ ЕРТЕҢІ
«Жастар жарқын болашаққа...» тақырыбындағы рубрикамыздың кезекті кейіпкері - қоғам белсендісі, Ш. Уәлиханов атындағы Көкшетау университетінің «География және тарих» кафедрасының 3-курс студенті Беген Сырым Серікұлы.
Болашағының жарқын болып, ойлаған арманын іске асырып, алдына тың жоспарлар қоя білген адам ғана өзінің жетістігіне, арман-мақсаттарыңа қол жеткізе алады.
Сырым Серікұлы өзінің бойындағы бар қабілетін білекпен емес, біліммен бағындырып жүрген қайсар азамат.
Бүгінде білім бұлағынан молынан сусындауға зейін қойып, саналы ұрпақтың қатарынан болуға аянбай еңбек етуде.
Қазіргі дамыған заманда жастар білімді болуға тиіс, сонда ғана олар бәсекеге барынша қабілетті болып, өмірден оз орындарын таба алады.
Кейіпкеріміз Сырым Беген өзін әр бағытта барынша белсенді көрсетіп жүрген жастарымыздың бірі. Атап айтсақ, Ақмола Пікірсайыс Федерациясының директоры, «Қыр баласы» қоғамдық қоры Ақмола филиалының директоры, «Алаш Жолы» жастар тарихи ұйымының Президенті және т.б жастар ұйымдарының қатарында.
Белсенді студентпен сұхбат барысында ұлттық мақтаныш, ұлт намысы, ұлттық ерекшеліктерге тоқталып, өз ұлтына қызмет ете білу керектігін атап өтті.
«Арыстандай айбатты,
Жолбарыстай қайратты.
Қырандай күшті қанатты,
Мен жастарға сенемін! - деп, Мағжан ақын айтқандай, осындай қайратты, қанатты жастардың қатарында болғым келеді» дейді кейіпкеріміз.
Сырым Серікұлы өз қатарындағы жастарға: «Бөліңбендер. Жаңашылдыққа ұмтылыңдар. Өздеріңе сеніңдер. Мемлекет маған не береді деп емес, мен мемлекетке не беремін деп ойланыңдар сонда ғана жетістікке жетесіңдер» - деп, өзінің ақыл-кеңесін айтты.
Кейіпкеріміз тарихты дамыту, ұлттық құндылықтарды қастерлеу, жаһандық мәселерді танып-білу, оларды оңтайлы шешу мақсатында аянбай жұмыстар атқарып жүрген белсенді жас.
Ол өзін «Бой емес, ой жарыстыратын заманда» өзін жан-жақты, бәсекеге қабілетті, ынталы болуға тәрбиелей отырып, кейінгі жастарға үлгі-өнеге де болып отыр.
«Болашақ - жастардың қолында», - деген сөзді ұран етіп, болашаққа нық қадам басу, көк туды көк аспанда желбірету біздің айқын мақсатымыз.
Жаңашылдыққа, әділеттілікке ұмтылған Сырымдай азаматымыздың алдағы істеріңе сәттілік тілейміз
ЖАЛҒАСЫ БАР⬇️