Рет қаралды 7,762
Məşhur filmlərimizin çəkildiyi Naxçıvana yaxınlarda səyahətim oldu. Gəlin sizə səyahətimdən və orada çəkilən filmlərdən danışım.
Naxçıvan bizi günəşli bir hava ilə qarşıladı. Bir-birindən maraqlı yerləri isə adamı özünə heyran elədi. Bir tərəfdə başı qarlı dağlar və Batabat gölü, digər tərəfdə müalicəvi “Duzdağ”, vestern filmlərindən çıxmış kimi görünən qırmızı dağlar, düzənliklər təbiətin rəngarəngliyindən xəbər verirdi. “Xan sarayı” və “Möminə Xatun” türbəsi, qədim küçələr, hamamlar, ev muzeyləri isə insanı keçmişə aparırdı. “Əshabi Kəhf” mağarası isə öz mistik ab-havası ilə insanı özünə çəkməyi bacarırdı. Hər yanda qonaqpərvər insanlar, əllərindən gələni əsirgəməyənlər. Səfərdə yolumuzu Badamlı zavoduna da saldıq. Tam avtomatlaşdırılmış istehsalla yerin altından çıxan suyun qablaşdırılaraq süfrəmizə gəlib çatmasına nail olublar. Hər bir detalı ilə Naxçıvan xoş xatirələrlə yaddaşıma yazıldı. “Babək”, “Nəsimi”, “Dədə Qorqud” kimi tarixi filmlərimizin bəzi səhnələri, “Gümüşgöl əfsanəsi” və “Doğma Sahillər” məhz Naxçıvanda çəkilib. Məncə, bu yerlərin təbiəti, tarixi hələ daha neçə-neçə filmlər çəkmək üçün uyğundur. Bəs siz Naxçıvanda çəkilən hansı filmi ən çox bəyənirsiniz?