Рет қаралды 78,146
Бірнеше жылдан бері қуаңшылықтан зардап шегіп отырған Маңғыстау облысында әлі де төтенше жағдай жарияланған жоқ. Малдары көтерем болып, көбі қырылып қалған өңірдегі шаруалардың жағдайы оңалмаған. Ал үш күн бұрын ауылшаруашылығы министрінің міндетін атқарушы болып тағайындалған Ербол Қарашөкеев облысқа 1 миллиард 800 миллион теңге қаражат бөлінгенін айтады. Алайда сарапшылар бұл қаржы Маңғыстау облысы үшін өте аз деп есептейді.
Жем-шөптің жоқтығынан малдары көтерем болып, көбі қырылып жатқан Маңғыстау облысындағы шаруалардың жағдайы күн санап қиындап барады. Ал аудан орталығынан шалғай орналасқан ауылдарға жем-шөпті жеткізу мәселесі әлі күнге дейін шешілмеген. Оның үстіне облыстық бюджеттен бөлінген қаражатқа арзан бағада әкелінген мал азығының бағасы шаруаларға жеткенше аспандап кетеді. Мамыр айынан бастап облыстық әкімдік қанша тырысқанмен, малды аман алып қалу мүмкін болмай жатыр дейді шаруалар. Ал қоғам белсендісі Жәнібек Қожық бос сөзді қойып, іске көшу керек екенін айтады.
ЖӘНІБЕК ҚОЖЫҚ, қоғам белсендісі:
- Жаңбыр жауып жақсы болып кетпесе, Маңғыстауда тігерге тұяқ қалмайды. Қазір төтенше жағдай болмайды бүйтеді, сөйтеді деген. Ертең төтенше жағдайды өздерің жариялауға мәжбүр боласыңдар.
Ал тағайындалғанына үш күн болған ауылшаруашылығы министрлігінің міндетін атқарушы Ербол Қарашөкеев бірден көзге түскісі келді ме, әлде оған берілген тапсырма осындай болды ма, әйтеуір Маңғыстау облысына іс сапармен келді. Ол қуаңшылық мәселесін шешуге республикалық бюджеттен 1 миллиард 800 миллион теңге қаражат бөлінгенін және осы аптаның соңына дейін облыстық бюджетке түсетінін хабарлады. Десе де халықтың сұраған төтенше жағдай жариялау туралы сауалын нақты шеше алмады.
ЕРБОЛ ҚАРАШӨКЕЕВ, ҚР ауылшарушылығы министрінің міндетін атқарушы:
- Негізі төтенше жағдайды жариялау жергілікті әкімшіліктің құзыреті. Бізге ондай ұсыныс, мәлімет келген жоқ. Ол кісілерді де түсінемін. Олар енді төтенше жағдай жариялағымыз келмейді деп отырған жоқ. Гидрометпен де сөйлесіп келе жатырмыз. Өзінің талаптары бар. 20 күннің ішінде үзілмей температура 30-дан биік болу керек, жердің құрғақтығы да 30 пайыздан төмен болу керек.
Мал баққан қара халықтың тағы бір мәселесі - әр малды базаға тіркеу. Шаруалардың айтуынша, бір малды чиптеу құны 700 теңге. Оны бірінің қалтасы көтерсе, зейнетақысына күн көріп отырғандарға оңай емес. Сарапшылар өңірді қуаңшылықтан құтқару үшін құр шөпті тасу тиімсіз дейді.
АЛМАСБЕК САДЫРБАЕВ, «Шопан ата» ұлттық мал өсірушілер қауымдастығының төрағасы:
- Миллиард 800-ді алып ресми тіркелген 400 мың бас малға бөлетін болсақ, әр малға шамамен 5 мың теңге. 5 мың теңге деген ол бүкіл малдың қыстық азығы ма, көктемдік азығы ма, күздік азығы ма белгісіз.
Республикалық бюджеттен бөлінген 1 миллиард 800 миллион теңгенің өзі Маңғыстау облысына аздық етеді дейді Алмасбек Садырбаев. Өйткені басқа облыстарда мал басына 30 мың теңге субсидия бөлінеді. Ал мал баққан азаматтарды өзге аймаққа көшіру үшін үкімет тарапынан көмек керек. Сондықтан төтенше жағдай жариялау қажет дейді шаруалар.
Махаббат Нұржанқызы, Мұхаммед Шадкам
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#қуаңшылық #Маңғыстау #апат #ірі_қара