Рет қаралды 8,747
Соңғы жылдары Маңғыстау облысындағы Жаңаөзен қаласының келбеті адам танымастай өзгерді.
Қаланы дамытудың кешенді жоспары аясында зәулім ғимараттар тұрғызылып, қажетті әлеуметтік нысандар бой көтерді. Көшелер жаңартылып, шаһар 100 пайыз жарықтандырылды. Жер астынан мұнай мен газ шығып жатқан шағын шаһар жасыл-желекке оранды.
Биыл Жаңаөзенді көркейту жұмыстарына жергілікті азаматтар да атсалыса бастады. «Туған жер» бағдарламасы аясында субұрқақ, саябақтар салынып, балаларға арналған ойын және спорт алаңдары ашылған.
Бұл - жергілікті Бердияровтар әулетінің туған қаласына жасаған тартуы. Серікбай Бердияров бала-шағасымен бірге түрлі-түске боялып, әуенге мың бұрала билейтін субұрқақ орнатты. Субұрқақтың шапшу биіктігі 10 метрге жетеді. Ол іске қосылған уақытта классикалық музыкамен қатар қазақтың күйлері күмбірлей төгіледі.
Биыл Жаңаөзенде жергілікті азаматтардың атсалысуымен осындай 4 бірдей субұрқақ іске қосылды. Бесіншісі қаланың орталық саябағында салынып жатыр. Айналасына тұрғындардың серуендеп, демалуы үшін орындықтар қойылып, сәулетті мүсіндер орнатылуда. Қазір шаһардағы екі саябақ та толық жаңартылып жатыр.