Тұңғыш Президенттің тарихи-мәдени орталығында Қазақстан Республикасының Мемлекеттік рәміздер күніне арналған
«Мақтанышы елімнің » атты іс-шара өткізілді. Аталмыш шараның мақсаты - Тәуелсіздігіміздің басты нышаны болып табылатын Мемлекеттік рәміздеріміздің пайда болуы мен тарихтағы маңызы жайлы кеңінен түсінік беру, жастарды отансүйгіштікке тәрбиелеу және Мемлекеттік рәміздерге деген құрметті арттыру болып табылды.
Ашық іс-шараға қаламыздың ардагерлері мен Теміртау қаласы колледжінің студенттері қатысты. Шара барысында қатысушыларға Мемлекеттік рәміздеріміздің тарихы жайлы бейнебаян көрсетіліп, отансүйгіштікке шақыратын әндер орындалды. Жастар теміртаулық көп балалы ана Қорлан Нұрғалиқызының ғибратты әңгімесін тыңдады. Ұлағатты ұрпақ өсірген, сексеннің сеңгіріне шыққан Қорлан ана Жеңіс мерекесі қарсаңында Воронеж қаласындағы Бауырластар зиратында жатқан Отан соғысында қаза тапқан марқұм әкесі Нұрғали Күлейменовтың басына барып қайтқаны жайлы әңгімеледі.