Рет қаралды 2,231
Aybəniz Abbasovanın ailə təsərrüfatı martın 1-də tavanın çökməsi nəticəsində məhv olub. 11 iribuynuzlu heyvan uçqunun altında tələf olub.
Sakinlər bildirir ki, Fövqaladə Hallar və Daxili İşlər nazirliklərinin “qaynar xətt”inə zəng edərək heyvan cəsədlərinin aparılmasını istəyiblər. Amma bu qurumlardan ailəyə dəstək olan olmayıb. İndi həm Abbasovlar, həm də ətrafda yaşayan sakinlər ölü heyvanlardan epidemiya yayılmasından qorxurlar.
Fövqaladə Hallar Nazirliyindən Meydan tv-ə deyilib ki, heyvan cəsədlərini yığışdırmaq onların işi deyil. Fermer ailə isə texnika çağırmaq üçün maddi imkanlarının olmadığını bildirirlər
Zərəçəkənlər danışır ki, heyvanları saxladıqları tikili zahirən sağlam görünüb, onlar tavanın uçacağını gözləmirlərmiş. Uçqundan sonra isə qəzalı vəziyyət yaranıb. Tavanın uçmayan hissələrində qalan daşlar hər an düşə bilər.
Abbasovlar Laçından məcburi köçkündür. Aybəniz Abbasovanın anası Minkənddə Ermənistan ordusuna əsir düşüb. Bugünə qədər hələ də xəbər ala bilməyən ailə Ceyranbatanda mal-qara saxlayaraq həm dərdini unutmağa çalışıb, həm balalarını süd-qatıqla böyüdüb. Yadigar Abbasov deyir ki, mal-qarasının sığortası da yoxdur. O, heç vaxt bu barədə eşitməyib də.
Abbasovlar Laçından gələndən sonra bankdan kredit götürüb mal-qaranı alıb. Həmin vaxt dövlətdən heç bir dəstək almadıqlarını deyirlər. Aybəniz Abbasova mal-qarasının məhv olmasını ikinci dəfə məcburi şəkildə didərgin düşməyə bərabər tutur. O, dolanmaq üçün təzədən mal-qara almağa, yeni ferma tikməyə nə ömrünün yetəcəyini, nə də buna maddi imkanı çatacağını düşünür. İndi Abbasovların tək ümid yeri dövlətdir. Əgər dövlət onların zərərini qarşılasa, fermalarını təmir edib, mal-qara bağışlasa, bu qatıqlardan Aybəniz Abbasova yenə də hazırlaya biləcək.