Сырдың бойы жыраулық пен күйшілік өнердің біте қайнасып, қосөзендей қатар ағып, бірінің арнасын бірі толықтырып жатқан киелі дәстүрдің бір мекені. Қазақтың даласының кие қонбаған топырағы жоқ. Жыраулық өнердің тамыры бойлаған жерде күйші жырдан азық алмай тұрмайды. Ертеден-ақ жыр күйлері біздің тарихымызда болған, сақталған. Оған дәлел Сырдың бойындағы «Дәріғұл жыраудың жыр күйі», «Жаңабергеннің жыр күйі», «Жансүгір жыраудың жыр күйі» т.б. секілді күйлер. Қазіргі заман күйші-композиторларының қатарынан Сыр бойылық Қошқарбек Тасбергеновтің «Сыр Ақжелең», «Нартай Қосбасар» күйлерінің түгелдей дерлік дені жыраулық өнерден бастау алғандығы, «Нартай Қосбасар» күйі жырау Нартай Бекежановтың мақамдары негізінде пайда болғанына автордың өз сөзінен куәміз. «Жыр тарамы» авторлық күйінің негізгі сазды әуені осы өлкенің мақам-саздарының бойға сіңіп, мақам негізінде күй формасына жалғасқан, Сырдың бойындағы үлкен жыраулық өнердің бір саласының, бір тарамының күй өнерімен өрнектелген көрінісі.