ملخص تجربة الكروز - الرحلة كانت في يونيو ٢٠٢٣
.
بعض الاسئلة اللي ممكن تجي في بالكم:
من وين تبحر السفينة؟
من موانئ كثيرة انا ابحرت من برشلونة ودورة مدة ثمانية ايام في البحر الابيض المتوسط
.
هل تنفع للصغار؟
نعم حاليا كثير من الشركات بدأت تفكر بالصغار وفيه فعاليات كثيرة جدا واماكن مخصصة لهم
.
هل فيه اكل حلال؟
على حسب اللي يشتغلوا هناك نعم حلال وفيه عمال كثر من الهند والفلبين وغيرهم وفيه عدد منهم مسلمين ، بس الاكل الحلال قليل ويفضل انك تسأل الموظفين دائما عن كل شي حتى الحلويات
.
هل فيه انترنت في السفينة ؟
نعم فيه وفيه باقات كثيرة وكلها تعتبر غالية، بس انا رايح استمتع واخر همي كان النت ، احد الخصائص الجميلة في تطبيق شركة كوستا انه الشات مجاني من داخل التطبيق داخل السفينة مفيد جدا اذا كنتوا في كبائن مختلفة وبعيدة عن بعض
.
هل مسموح اجيب معي كواية او اي شي من الخارج؟
الكواية واي شي ب طاقة عالية ممنوع وكل شي مكتوب في مواقع هذي الشركات
.
هل فيه زحمة كثير وهل الامر مزعج ؟
السفينة تكفي ستة الاف شخص وكانوا معنا ثلاث الاف بدون الموظفين ، ونعم كان زحمة في المسابح وفي البوفيه لكن كل شي كان مرتب والناس كلها بالدور والكل فاهم ومقدر
.
هل الموظفين متساعدين ؟
نعم بقوة متساعدين وفي كل شي ما قصروا ابدا ، أسال اي شي تريده وبتحصل اجابتك
.
هل الرحلة تصلح لكبار السن ؟
نعم تصلح وعددهم كان كبير جدًا في السفينة
.
هل الرحلة تصلح للعرب والمسلمين ؟
هذا سؤال كبير ومعقد، اعتبر المكان فندق متحرك والرحلات هذي مخصصة للاجانب يعني ماخذين راحتهم في اغلب الامور ، انا والاولاد رايحين وكل هذي الامور في بالنا ورايحين نستمتع بدون ما اركز على شي
، ويمكن بعض رحلات كروز الخليج حبتين افضل
.
ليش اخترت هذا الوقت من السنة؟
لسببين ، الاول انه وقت مناسب لي وللاولاد ، الثاني لانه الحرارة بعدها نوعا ما كانت معتدلة الى حارة ، يعني الالعاب المائية والمسابح مناسبة جدا ، الوقت البارد ما بتقدروا تستمتعوا وبتكون الرحلة ناقصة خاصة مع الاولاد
.
هل الموظفين يتكلموا انجليزي؟
نعم الاغلب يتكلم والاغلب يتكلم من لغة الى ثلاث لغات وما حصلت حد يتكلم عربي ، يمكن في رحلات الخليج يتكلموا عربي
.
هل تحتاج فيزا؟
نعم تحتاج شنجن فيزا او فيزا للدول اللي بتروح لها
.
هذا كل اللي في بالي حاليا واذا عندكم آي أستفسار بكون في خدمتكم وبحاول ارد على كل شي
.
ملاحظة: الفيديو هذا ما دعايا لاي شركة ولا هو شي مدفوع ،، فقط تجربة وحبيت انقلها لكم وعشان تكون مرجع جيد وبسيط
.
شكرا