ხაშურის მუნიციპალიტეტის საკრებულოს სპეციალისტს ზურაბ ქურდაძეს, რომელიც 20 მარტს შიდა ქართლის საინფორმაციო ცენტრის წარმომადგენელს საკრებულოს შენობის დატოვებისკენ მოუწოდებდა და მუშაობაში ხელს უშლიდა, ნასვამობა დაუდგინდა. ამის შესახებ ხაშურის პოლიციის განყოფილებაში განაცხადეს. ქურდაძის შემოწმება ჟურნალისტმა შინაგან საქმეთა სამინისტროს საინფორმაციო ცენტრს ,,112″-ს 20 მარტს 16:30 წუთზე მოსთხოვა. 21 მარტს კი საკრებულოში განაცხადეს, რომ ქურდაძე პოლიციელებმა მოძებნეს და ის სუფრაზე ნახეს, ოღონდ არასამუშაო საათებში.
შიდა ქართლის საინფორმაციო ცენტრის წარმომადგენელი ხაშურის საკრებულოში 20 მარტს გამგებლის გადარჩევის საკითხის გასარკვევად იყო მისული. გამგებელი გოგი ბერაია 19 მარტს გადაირჩიეს და დანიშნეს მამუკა ხაჩიძე. ჟურნალისტს ადგილზე არც საკრებულოს თავმჯდომარე დავით ლომიძე და არც მისი მოადგილე, თავისუფალი დემოკრატების წევრი გიორგი ცხადიაშვილი დახვდა. ლომიძე შვებულებაში გასულა, ხოლო მის მოვალეობას ცხადიაშვილი ასრულდებდა.
ამის შემდეგ ჟურნალისტმა ინფორმაციის მისაღებად საკრებულოს აპარატს და საკრებულოს წევრებს მიმართა. საკრებულოს სააქტო დარბაზში, სადაც აღმოჩნდა, რომ სურამის სტიქიის შემსწავლელი კომისიის წევრები იმყოფებოდნენ, ჟურნალისტის დანახვაზე აგრესია გამოხატეს. მათი თქმით, სააქტო დარბაზი საიდუმლო ოთახს წარმოადგენდა და ჟურნალისტს უნდა დაეტოვებინა. კომისიის წევრებმა ვიდეო-კამერის დაზიანება, ხოლო დარბაზის დატოვება იძულების წესით სცადეს. პიროვნებებს შორის ნასვამებიც აღმოჩნდნენ.