Қазақ боксында тағы жанжал! Бір елдің намысын қорғап, бір жаттықтырушының тәлімін алып жүрген Ангелина Лукас пен Назым Қызайбайдың нақты нені бөлісе алмағаны әзірге белгісіз. Бірақ, Бокс федерациясының атқарушы директоры Маратбек Мықтыбеков "Ангелина Лукас үш күн бұрын Назым Қызайбайдың жатын бөлмесінің алдына дуаланған тұзды сеуіп" кеткенін айтты. Ал, Ангелина Лукас керісінше басшылық еш негізсіз құрамадан шығарып жіберді деп, Елбасы мен Президенттен араша сұрап отыр.
Қос қыздың арасындағы дау Ангелина Лукастың Қазақстан чемпионатында Назым Қызайбайдан жеңіліп қалғанынан, кейіннен Токио олимпиадасына жолдама ала алмай қалғанынан басталған. Ангелика Лукас үш күн бұрын инстаграм парақшасында "Назым Қызайбай маған күн көрсетпеді, құрамадағы барлық қыздарды уысында ұстайды, менімен сөйлестірмейді, бокшсы қыздар темекі шегіп, спиртті ішімдік ішеді, мен Назым Қызайбайдың кесірінен құрамадан шеттетіліп қалдым" деп жазды. Ал, Бокс федерациясындағылар керісінше, Назым Қызайбайдан жеңіліп қалғандықтан Ангелина Лукас неше түрлі қитұрқы әрекеттерге барды деп отыр. Тіпті, жеке бапкерімен Назым Қызайбайдың бөлмесінің алдына дуаланған тұз сеуіп кеткен. Мына кадр соның айғағы дейді.
МАРАТБЕК МЫҚТЫБЕКОВ, ҚР Бокс Федерациясының атқарушы директоры:
- Лицензионный тур болды. Олимпиада алдындағы. Соған Қызайбай емес, Ангелина Лукас барған болатын. Сол жерде лицензия алу керек болатын. Өкінішке орай лицензияны ала алмай қалды ол қыз. Осыдан бері дау боп келе жатыр. Мені қысады, систематический қысады, сборда күн көрсетпейді деп айтады. Но, ол жайында ешқандай видеофакт жоқ!
Бокстан Мемлекеттік жаттықтырушы Бахтияр Артаев Ангелина Лукас рұқсаты болмаса да бірнеше рет жарнамаларға түскенін айтты. Бірнеше рет спорттық этиканы сақтамай, басшыларға "Президентке дейін шығамын" деп дөңайбат шеккен. Мұның бәрін білетін Ұлттық құрамадағы 30 қыздың 22-сі Назым Қызайбайға емес, жұмысымызға кедергі келтіріп, жеке бапкерімен мазамызды алды деп, Ангелина Лукасқа қарсы петиция жариялапты.
БАҚТИЯР АРТАЕ, бокстан ҚР құрамасының мемлекеттік жаттықтырушысы:
- Қыздардың шешімі бар. Бапкерлердің шешімі бар. Жалғыз бір бапкер емес, Ұлттық құраманың бас бапкері мен қасындағы көмекші бапкерлердің шешімі бар. Бізге служебный хатпен шығып, барлығының хаты бар, қыздардың хаты бар. Жаңағы видеолар бар. Осының бәрін қорытындылай келе осындай шешімге барғанымыз да сол!
Ал, Ангелина Лукастың өзі бізге сұқбат бермегенімен, бүгін спорт сайтына шыққан сұқбаты жарияланды. Онда ол оның бапкері үнемі үстінен қыз баланың шашын тауып ала беретінін, қолына жағымсыз иісі бар сұйықтық жабысып қала беретінін, кейіннен өз бөлмесінен бір уыс тұз тауып алғанын айтады.
Мұның барлығын Назым Қызайбайдан көрген Лукастың жеке бапкері Рахманбек Арғынбаев тұзды Назымның бөлмесінің алдына сеуіп кеткен. Атышулы видеоны осылай түсіндірген Ангелина Лукас "Назымның провакациясына берілмеңіз" деп, жанында ілесіп жүрдім дейді.
Сондай-ақ, боксшы қыз "мені Бақтияр Артаев пен Маратбек Мықтыбеков ұлттық құрамадан шеттете алмайды, босатылғаным туралы ешқандай құжат көрсетпеді" деп отыр. Ал, Назым Қызайбай "кім не десе о десін, мен ешкімге сұқбат бермеймін" деп шорт кесті. Рингтегі қарсыласын өмірдегі бақталасына айналдырып алған Ангелина Лукастың енді қандай қадамға баратыны әзірге белгісіз.
Айбар Төлжанұлы, Нұркен Тоқмурзин
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#бокс #жанжал #құрама #НазымҚызайбай #АнгелинаЛукас