📌 Abdulla Qodiriy ijodiy merosi, xususan, “O‘tkan kunlar” asaridan bahramand bo‘lish - doimo davom etadigan, avlodlar nazdida yangilanib turadigan sog‘inchli, ayni damda, o‘tmishga aylanmaydigan adabiy va abadiy qadriyatlar sirasiga kiradi.
Abdulla Qodiriy adabiy merosi o‘zidan keyingi o‘zbek adiblari ijodi uchun mahorat maktabi vazifasini o‘tadi. Qardosh xalqlarning romannavislari adibni o‘zlariga ustoz sifatida e’tirof etishadi.
👍 Garchand adib original asarlar yozib, o‘z xalqining ma’naviyati xazinasini bebaho durdonalar bilan boyitayotgan bo‘lsa ham, mustabid tuzum malaylari uni dushmanlikda aybladi. Lekin, haqiqat egiladi, bukiladi, ammo sinmaydi, deganlaridek, ulkan iste’dod egasi bo‘lgan Abdulla Qodiriyning asarlari xalqimizning qalbidan chuqur joy oldi va unga bo‘lgan qiziqish davrlar o‘tsa-da, hech qachon so‘nmaydi.
Adib o‘z asarlarida o‘zining bor mahorati bilan o‘zbek adabiy tilining boyligini, o‘zbek tilining keng imkoniyatlarini namoyish ham qilgan. Shuning uchun ham “O‘tkan kunlar” necha marta o‘qilsa ham, qayta mutolaaga ehtiyoj sezaveradi. Roman o‘quvchini zeriktirmaydi. Qayta o‘qish jarayonida asarning yangidan-yangi qirralari kashf etiladi. Bir o‘qilganda e’tiborsiz o‘tilgan epizodlarga boshqa safar diqqat qaratiladi. Abdulla Qodiriy so‘zida insonni o‘ziga bog‘lab turadigan, insonni o‘ziga ohanrabodek tortib turgan quvvat bor. Romandagi hatto epizodik qahramonlarning fikrlari ham teran, mulohazalari hikmatlar bilan to‘yingan. Kitobni qayta-qayta o‘qisangiz, o‘zingiz ham bunga guvoh bo‘lasiz.
📌 Qadrli talabalar! Sizlarni “O‘tkan kunlar” romanini takror-takror mutolaa qilishga chorlab qolamiz! Zero, takrorlash - bilimning asosidir!