Рет қаралды 595,830
Сенбі қауырт жұмыс күні болды. Демалысқа қарамастан облыс әкімі Бердібек Сапарбаев "Табыс" коммуналдық базарын аралады. Бағаны мұқият бақылап, тіпті көмекшісінің қолындағы статистикалық мәліметті салыстырды. Әп дегеннен сатушылармен тілдесіп, олардан жалға алатын орындарының құнын сұрады. Қымбат деп бас шайқады, әр шаршы метрі қанша теңге екенін білмеген базар басшысына көңілі толмады. Бұл алғашқы ескерту. Кейін әр қадам сайын қателік табылды. Нан сатушылар да санитарлық норманы сақтамайды. Облыс басшысы жалаң қолмен нанды ұстап, сатып жатқандарды сынға алды. Өңір басшысы ет бағасына айрықша мән берді. Сатушылар еттің келісі 850 теңге деп жазып қойған. Дәл осы қағаздың екінші бетінде 900 теңге деп жазулы тұр. Елді алдағандар, қатаң жазаланады. Облыс басшысы Бердібек Сапарбаев жарық таратушы компаниялардың жұмысымен де танысты. "Кегок" акционерлік қоғамы мен "Энергосистема" жауапкершілігі шектеулі серіктестігінің жұмысынан да кемшілік табылды. 20 жыл өтсе де жарық таратушылар иесіз қалған электр желілері туралы нақты білмейтін болып шықты. Бердібек Сапарбаев "Ақжар-2" ауданындағы шағын станция жұмысымен танысып, "Нұр Ақтөбе" ауданына да ат басын бұрды. Жаңа баспаналар "Тұрғын үй құрылыс жинақ банкі" арқылы беріледі. Облыс әкімі Бердібек Сапарбаев үйлердің сыртқы келбетіне қатысты сын айтты.
Облыс әкімі Орталық базар маңындағы көлік кептелісін де көрді. Базарға жетпей, жарты жолда көлігінен түсіп, жаяу жүруіне тура келді. Бұлай жаяулатып базарға келген әкімді бұрын-соңды көрмеген сатушылар аң-таң. Қойылған сұраққа жауап бере алмай мүдірді. Бердібек Сапарбаев мұнда да ет сатушылардың қитұрқы әрекетін әшкереледі. Осылайша Орталық базардың іші-сыртын түгел қарап шыққан өңір басшысы қозғалысқа кедергі жасайтын көліктерді алып тастауды талап етті. Қажет болса айыппұл салу керектігін айтты. Аялдамаға келіп, автобустың жайын сұрады, халықпен тілдесті. Әдетте көшенің тарлығы мен автобустардың жүрісіне көңілі толмайтын жұртшылық алдарына әкімнің өзі келгенде "бәрі жақсы" дегеннен басқа сөз таппады.