‍Бугун онамнинг туғилган куни. Мени дунёга берган аёл дунёга келган кун!
***
Йўллар моматалоқ, товонинг яғир,
Она, эллик йилки елдинг-югурдинг.
Қисмат гурзилари бахтингни ёрган
кечалардан бўлак нимани кўрдинг?
Қонингдан унгандим, оқдим кўзингдан,
Ким тўккан ёшини ололган тўплаб.
Сен кунда эслайсан,
менчи, ёдингни
эркалолмам ҳатто тушимда эплаб.
Она, ўғил эмас туққансан шамол,
Тош туғсанг ёнингдан жилмасди нари.
Қандай гўзал эдинг, сиғинардим, рост,
Ярашиб турарди хол, сепкилларинг.
Момотут бағридан юзингга кўчган
ажинлар оралаб юрибман бугун.
Қачон ичимдаги аланга ўчгай?
Тўхташни билмайман қайтишим тугул.
Норасо мавжудот эканда шоир,
Йўқлик уммонига қилар тили ғарқ.
То тирик, орқа-олдига боқмай
тасаввур кетидан итдай илиқар.
Она, сен - соғинч, мен - сўзга юклиман,
Бор қайғу, дардларинг хотирамга сот.
Юрагим дард тутган аёлдек тавба,
Ҳар саҳар шеър туғиб дод солади, дод!
О, буни кўрмагин, бардошинг етмас,
Тағин йиғлайди ҳам сатрлар синграб.
От ёлидан эшиб ингичка сиртмоқ,
Кутар Ажал - овчи, қайтишим сенга.
Она, тош бўлолмай балки ютқаздим?
Ичикма, қалбингдан тушсам тайриниб.
Туфроқдан жисмингга кўчиб ўтгандим,
Самога кетяпман сендан айрилиб.
Жонтемир
@Jontemir_t