benarkah orang palembang kasar
Mang dayat Episode 219
apo kabar mang cek bicek salam sedulur dari mang dayat, Sebagai wong Palembang sebenernyo agak risih dengan stikma kito palembang ni kasar diluar sano, sebenernyo kalo kito pikir nak suku apo bae kalo lagi emosi pasti kasar jugo, kalo ado yang ngatoke wong palembang banyak pelaku kriminal, sebenernyo suku lain samo bae, bedanyo mereka dak dibesak-besak ke bae ceritonyo, kalo ado ngomong palembang dak aman, yo ado daerah-daerahnyo yang dak aman, dak sepalembang anget ini, mang dayat pikir daerah lain jugo cak itu, pasti ado daerah-daerah yang dak aman nyo, stikma ini terus bergulir diluar palembang yang mang dayat yakini dari mulut ke mulut wong-wong luar palembang yang dak kenal bahkan belum pernah kepalembang, buktinyo perantau yang datang kesini 90 persen mengakui palembang kota yang nyaman, buat betah bahkan ngangenin, apolagi kalo la tekeno pesona masem pedesnyo tekwan model. Melalui konten ini mang dayang omongke wong palembang ni baek-baek dak cak yang diomongke wong selamo ini, terus nggapo ado omongan cak itu
1. Pertamo dari segi bahaso, kito di palembang ini bahkan mungkin biso diomongke sumatera, intonasi ngomong nyo agak tinggi, pecak nyegak-nyegak men uji kito ni, tapi sebebernyo ini bukan kasar tapi gaya bahasa kito ini dipengaruhi uleh budaya sungai, hampir seluruh sumsel ini namo sukunyo berasal dari namo sungai, peradapan sungai inilah yang mempengeruhi intonasi kito, mang cek bicek perhatikan daerah-daerah se sumsel, kalu aliran banyunyo deres umumnyo intonasinyo agak tinggi ngomongnyo, tapi kalo sungai nyo tenang agak mendayu ngomong masyarakatnyo, kalo aliran nyo deres pastila kito ngomong agak teriak-teriak bawakkan beradu besak dengan suaro banyu, selain itu sehalusnyo ngomong wong peradapan sungai masih tinggi intonasinyo kareno selalu teriak-teriak ngomong dari jauh, berbeda dengan masyarakat yang di pegunungan ataupun awalnyo daerah hutan, komunikasi mereka cendrung lebih halus dan nada nyo rendah
2. Keduo nenek moyang kito ini kecendrungan hidup nyo dari berburu, dan bukan bercocok tanam, dalam berburu kecekatan dan jugo kecepatan adalah hal yang utama, jadinyo kito wong palembang ini karakternyo sudah terbentuk pecak pemburu yaitu lebih milih menghadapi masalah daripada mundur kemudian namonyo hargo diri dijunjung tinggi nian, hal inilah yang mungkin dianggap kasar saat itu menjago hargo diri kito
3. Faktor ketigo nenek moyang kito ini ajalah penjelajah, makonyo wong kito di sumsel ini dak heran lagi kalo diomongke banyak merantau, wong yang berani merantau pastilah sudah nyiapkan mental dalam menghadapi segalo rintangan dan harus disilesaikan dewek, nak mintak tolong samo siapo kito kalo ado apo-apo ditanah rantau, makonyo sifatnyo lebih dinamis bahkan terkesan kasar dalan perjuangan bertahan hidup, tapi jangan salah wong penjelajah ini jugo punyo sifat pinter beradaptasi dengan lingkungan, men uji kito ni pacak nitipke diri bahkan kalo ketemu kawan asal samo la cak dulur deketnyo
karakter asli wong palembang ini idak kasar, berikut karakter asli wong palembang versi mang dayat
1. Humoris, wong palembang ini seneng bekelakar, sampe ado istilah besak kelakar ataupun kelakar betok, segalo nak dikelakari, segalo tingkah laku kawan ado be celetukan nak dikelakari, memang dari beberapo penelitian 80 persen wong palembang ni seneng humor
2. Sopan Santun dan terbuka, Wong Palembang itu sopan-sopan, budaya ini dak terlepas dari identitas melayu dan islam, menjunjung tinggi yang namonyo adab, makonyo banyak nian idiom, istilah ataupun pantun-pantun di palembang ni, ini untuk ngomong secaro halus, karno memang kebanyakkan wong palembang susah ngomong idak, apolagi samo kyai-kyai atau guru lebih dengan penghormatan raso takzim, bahkan men bekendak atau ado omongan yang susah diomongan nyampe kenyo dengan pantun-pantun sindiran atau perumpamaan
3. Setia Kawan, Men dari segi setio kawan bukan muji insyaAllah la dikenal nian wong palembang ini setio kawan, dak dipalembang ataupun diluar palembang character ini sudah mendarah daging, karno itu biasonyo wong palembang men merntau banyak kawan tula
4. Semon itu artinyo Malu, wong palembang ini memiliki budaya semon yang kemudian menjadi characternyo, didikan budaya malu ini yang selalu ditanamkan dari pendidikan keluarga, wong palembang ni pempek tinggal sikok be malu ngambeknyo apolagi gawe maksiat, malu nian ngawekenyo
Nah inilah versi mang dayat, namonyo pendapat kan boleh bae, kalo ado pendapat yang berbeda jugo dak papo, tujuannyo mang dayat buat konten ini biar kito samo-samo saling jago namo kito palembang ini, dimulai dari individu masing-masing yang kemudian menunjukan bahwa kharakter wong palembang ni beradap dan ramah, penting jangan diganggu bae, yo dak mang cek bicek, kalaupun ado yang dak bagus itulah oknum, pisang setandan dak bagus galo, pasti ado bae wong kito yang pecah utak tu. Dan pasti suku-suku lain di dunio ini cak itu jugo