Рет қаралды 6,290
Түркістан облысының Отырар ауданына қарасты 10 ауылдың жүзден астам диқаны өздерінің егістік алқаптарына техникаларын жеткізе алмай отыр. Сөздерінше, «Қазсушар» кәсіпорны егістікке барар өткелдерді қайта жөндеп, каналды қоқыстан тазартып беруі керек еді. Бірақ, олардың жалдаған мердігерлері өткел-көпірлерді түгел қиратып, егістікке барар жолды жауып тастапты.
47 жылдан бері тазаланбаған каналдың ашылып, күл-қоқысы шығарылады дегенді естіген диқандардың әу баста қуанышында шек болмаған. Өйткені су тез жүріп, ысырап та азаяды деп сенген. Алайда егістікке барар өткелдер бұзылып, жолдары қоқысқа толғанда жұрттың бұл қуанышы су сепкендей басылған. Диқандардың айтуынша, мердігерлер жұмысты орта жолда тоқтатып, өздері бір күнде жоқ болған. Соның кесірінен егістікке бару қиындаған. Жолдар батпаққа толып, ені екі есе тарылып комбайн да өте алмай қалыпты. Диқандар бұл - егін орағы жақындағанда, елге жасалған қиянат,- дейді.
НҰРМАХАН ӘЛИЕВ, Диқан:
- Енді он күннен кейін келсе түкке жарамай қалады. Асты күйіп, шіриді. Бізге жолымызды істеп берсе болды. Көпірімізді қойып, бұрынғы қалпына келтіріп берсе болды. Біз ол өкіметтен ақша сұрап жатқан жоқпыз, орып бер деп жатқан жоқпыз. Өз дүниемізге өзіміз кіре алмай қалдық қазір.
Диқандардың енді бір бөлігі әлі ұрық сеуіп, дән екпегендер екен. Малын саудалап техника сатып алғандарға да, несиемен тұқым алғандарға да егістікке кірер жол мен судан өтер өткел керек.
САПАРАЛЫ ЖАМАНҚАРА, Диқан:
- Бес миллион кредит алдым. Он үш миллионға сеялкасымен «Белорусь» алдым. Сол қазір жанымды қысып, төлейтін ақша жоқ. Ана екі жоңышқаны орайық десек оған суағар болу керек. Жалғыз мен емес, маған ұқсаған шаруалар келіп тұр ғой міне, барлығының көрген күні осы.
Диқандар мәселені бір ай бұрын көтеріп, аудан әкімдігіне барған. Алайда, жергілікті билік жағдайды көзбен көргенімен, нақты көмек көрсетпепті. Тек тапсырыс беруші «ҚазСуШар» компаниясына хат жолдадық деп қайтарған. Аталмыш мекеме тазалауға тиісті канал 387 шақырымды құрайды. Алайда уәде етілген тазалық жұмысы да, комбайндар өтетін өтпежолы да аяқсыз қалған. Ондағылар бел ортадан үзілген жұмысты мердігерлердің жауапсыздығына сілтеді. Айтуларынша, мердігерлердің үстінен прокуратураға шағым түсіріп, республикадан 33 миллион теңге сұрапты. Енді өз күшімізбен шаруаларға қажетті уақытша жолын да, су өткелін де жасаймыз деді.
ХАМИТБЕК ЕРКЕ, «Қазсушар» РМК Түркістан филиалы Отырар өндірістік бөлімінің басшысы:
- Одан шыққан ескі трубалар бар 5 метрлік. Диаметрі мыңдық. Соларды белгілеп қойдық қай жерде қандайы бар екенін. Соған кранмен келуіміз керек. Әр жерден жинап, сол жаңағы өте алмай тұрған жерлерге уақытша өзіміздің ескі трубаны қойып, өткел жасап беруіміз керек.
Компания өкілі облыста техника мен жұмысшы күші бар, тек республикадан рұқсат күтудеміз деді. Қайта ретке келтіру шамамен бір аптада жасалады дейді. Ал, жұмысын тастап кеткен мердігер енді құзырлы орган айналыспақ.
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Отырар #диқандар_наразылығы