الف مبروك لخريجين الكورونا اذا حاب تشارك نصيحة للشباب المقبلة على هالمرحلة الجديدة من حياتهم اكتب نصائحك تحت

صح ان عندي فيديوهات كثير تعدت المليون مشاهدة لكن ماقد فرحت بفيديو زي كذا الحمدلله اللي طلعتوا بفايدة من هالتجربة وشكرا لكل من شارك تجربته❤️❤️

والله علبالي عمرك ٣٠ طلعت صغير ٢٣ العمر كله الله يحفظك يارب

اهم نصيحة لاي طالب جامعي : اعطي نفسك فرصه تتحمل المسؤولية .... من جميع النواحي دراسيا و اجتماعيًا. لانها تجربه مارح تتكرر في حياتك و ان خضتها بجدية رح تكسب احترام ذاتك بقية حياتك 🌷

نصيحة ١: القرين والزميل مو شرط الصديق ( اكثر شخص تجالسه ببيئة التعليم ) يشكل ٧٠٪؜ من مصير حياتك الوظيفي والجامعي والدراسي ! بتقلده بكل شيء لذلك انتقي اصحابك بشكل جيد او كن انت المحرك الدافع لهم ، ابتعد ان السلبيين او الي يطنشون كل شيء ، الزميل ممكن يرفعك فوق او ينزلك تحت بدون ما تحس ، ومارح تلاحظ هالشيء الا لمن تتركه. او حاول يكونو اصدقائك داخل الدراسة غير عن الي برا الدراسة اذا كنت مو متاقلم مع اصدقائك الدوافير . نصيحة ٢: النفسية والاستقرار مهم قبل كل شيء، مهما كانت الظروف المحيطة سيئة اذا ما حاولت تقوي نفسك وتشحن نفسك بالأمل والدوافع الي تخليك تكمل مارح تتقدم بالعكس رح تستسلم لها مثل : ( والله انا بجتهد عشان اغلب ظروفي وبعدها القى النتيجة وانبسط وانسى الي صار ) ،واغلب الناجحين كانت ظروفهم قاهرة ومحد تلقى النجاح على طبق من ذهب ! نصيحة ٣: لا تقارن نفسك باحد الا اذا كان هالشيء بيزيد من عزيمتك عشان تصير احسن منهم لكن اذا كنت شخص سلبي هالشيء ممكن يحبطك، تذكر ان لكل منا قصته وظروفه لكن كلنا قدراتنا متساوية والله خلق لنا قدرة عقلية واحدة واحنا الي نقدر ننميها او نحبطها . نصيحة ٤: قوي علاقتك برب العالمين واختار الطريق الصح وراجع تصرفاتك، اذا صلحت امورك مع الله رح يصلح الله كل امورك ( وما توفيقي الا بالله ). نصيحة ٥: لا تستسلم وترسم خطة حياتك وتقول انا كذا وانا كذا من قبل لا حياتك تبدي اصلاً ! نصيحة ٦: استشير بس لا تعتمد اعتماد كلي على استشارتك في تحديد قراراتك المصيرية حتى لا تلقي اللوم على الاخرين، اذا كنت تتاثر بكلام الاخرين كثير وماعندك قرارات لا تستشير اصلاً. نصيحة٧: لاتدخل تخصص اهلك يضغطونك عشان تدخل فيه بس ماقاعد تشوف نفسك فيه وقلبك مشغوف بتخصص ثاني ( الشغف هو اساس كل شيء) اذا ما كنت تحب تخصصك مارح تكمل فيه او رح تكمل بمعدل طايح ( زي الي امه وابوه يزوجونه وحدة ما يبيها ) ، ف الحل يا تحبب نفسك فيه يا تغير تخصصك قبل لا تعدي السنوات او من الاساس لاتدخل شيء انت ماتبيه. هذه اهم ٧ نصائح غيرت تغيير جذري فيني وكلها عشتها وجربتها والي ماعشتها شفتها بالي حواليني والله يوفقكم ونشوفكم بالي تتمنونه 💛👍🏻

خريج ٢٠٢١ عن بعد مر من هنا واشكرك على القصه المفيده والممتعه حسيت جتني همه اكثر اني اذاكر بشكل مكثف واكثر لاخر ترم واجيب اعلى نسب ودرجات ممكنه من تراكمي الى قدرات وتحصيلي بإذن الله ادخل التخصص الي ودي فيه وكل من قال أمين والله يوفقك في حياتك ويوفقنا جميع🌹

والله لو تعلم مدى تأثير هذه الكلمات البسيطة لزدت فرحةً فوق فرحة تخرجك 💛

نصائح لحبايبنا المقبلين عالجامعة من اخوكم متخرج قبل ٣ سنوات درست بجامعتين وتخصصين مختلفين تماماً ١-اقرأ واسأل واستشير قبل ان تختار تخصصك الجامعي. ٢- اذا حسيت نفسك متورط بالتخصص ومو قادر تستمر فيه عدل مسارك من بدري وغير التخصص مهما كلفك الامر من تأخير في التخرج لأن التخصص بيبقى معك طول حياتك. ٣-انتبه تغيب عن اي محاضرة الا بظرف قاهر وطارئ ٤- لاتسمع كلام الطلاب عن الدكاترة السيئين ولكن اذا كثر الكلام حول دكتور معين خلك حذر منه فقط ٥- في حالة الرسوب لاقدر الله ضروري تاخذ المادة صيفي عشان ماتعثرك في الخطة ٦- ضع في كل ترم مادة او مادتين سهلة مع المواد الصعبة بحيث تعمل موازنة في المعدل ومايهبط كثير اذا جبت العيد فالمواد الصعبة . ٧- الرسوب مو عيب ابدا ولاتخليه يحطمك. ٨ - المعدل قابل للإرتفاع حتى آخر فصل دراسي ولاتصدق الي يقولك ماتقدر ترفعه (اول ترم معدلي ١.٨٦/٤ تخرجت ٢.٩٨/٤). ٩-احذر من ضغط الجدول الدراسي اكثر من طاقتك. ١٠-كل المعاناة والتعب والارهاق الي تحس فيه وقت الدراسة والاختبارات صدقني راح تنساه مع استلام وثيقة التخرج وماراح يبقى معك الا الذكريات الحلوة. ١١- غالباً بعد التخرج تهدأ القروبات وينشغل معظم زملاء الدفعة في حياتهم الخاصة وتبدأ مرحلة الكفاح و العمل وتقل اجتماعاتكم وتواصلكم مهما كانت علاقتكم قوية ايام الدراسة لذلك اترك ذكرى جميلة عند زملائك. وفقكم الله آسف على الإطالة

يعطيك العافيه كثر من سوالف الجامعه في كثير مقبلين عليها 💙

تطور ملحووووظ بالتصوير والاخراج وكل شي ياخي هذا اليوتيوبر الي يقدر متابعينه وما يبخل عليهم ويطور من نفسه لنفسه أولًا ثم لمتابعينه .. الله يوفقك ويسعدك ومن افضل لأفضل يارب.

الله يرحم صديقك فهد العيباني ويغفر له ويتجاوز عنه، وبالنسبة للجامعة فهي من أفضل أيام الدراسة والتعلم اجتهدوا وثابروا ليصل كل منكم لطموحه وهدفه، ودكتور المادة هو نفسه المعلم في المدرسة ليس بينه وبينك شيء إلا المهنج الدراسي والاختبارات. وبالتوفيق للجميع.

الله يسعدك ويوفقك ويكتب لك الي فيه الخيرة المقطع هذا خريطة طريق كاملة واضحة صادقة لمرحلة من اهم المراحل ونواجه مشكلها في التكيف معها شكرا لك الله يحفظك

الله يعطيك العافية والف مبروك التخرج .. استفدت كثير والفيديو عطاني دافع كبير وفعلاً إنماً العلم فطنة 👍🏽 ومثل ماقلت الحياة مو كلها كتب نظرية ومواد جامعية هي اللي ترفع منك .. إنما طريقة تفكيرك وتضحياتك وصبرك هو العلم والإجتهاد بحد ذاته .. ولو انك ماواجهت هالعرقلات كان شخصيتك ونقاط القوة عندك ماكانت مثل لو كل شيء كان ماشي لك في السليم 👍🏽.. بالتوفيق للجميع

تسوي المقطع بعد ما تخرجت💔💔 يلا بس الحمدلله نحن خريجين كورونا نشكر الله على ان وفقنا ويسر لنا امورنا والله يرزقنا الوظايف الي نتمناها عشان نساعد ونعين اهلنا ونعيش حياة جميلة ❤️

الف مبروك وربي يسعدك انبسطت كثيير من المقطع صراحة❤️❤️

الف مبرووك ي نايف والله يوفقك ، وشكرا على هذا الفيديو الجميل المفيد 👍🏻❤️

سبحان من اعطاه القبول😂❤️❤️ اول فديو اشوفه واشتركت على طول ولايك على طول

يعطيك العافية والله استفدت منك بشكل ما تتخيل واعجبني انك اذا احد قالك عن شي مستحيل تكسر كلمته

اقولك شي الفيديو جى بوقته يانايف توني مخلصه تماريني وتعبانه وقاعده اتسحر ومتحمسه اسمع كلامك رغم انو انا جامعه الحين راح احس بمعاناتك ❤️

الله يرحمه ويطيب ثراه ✨♥️

نايف لازم تنتبه ترا سالفه المعدل التراكمي الحين تغيرت عن اول الحين صارو يحسبونها من اولى ثانوي

الففف مبروك التخرج يا نايف ويعطيك العافيه على القصة حقتك بغض النظر عن تجربتك لكن اني استمتعت والله .

هذا احلى مقطع لك ماشاء الله طريقة سردك للموضوع وكلامك المحفز والمعلومات الي في المقطع شيئ تشكر عليه شكراً لك الله يوفقك ويسعدك يارب 🌙❤️

ماشالله يالمونتاج والاخراج😍😍💜🔥🔥

تفرجت المقطع وانا مركزة بكل كلمة تقولها الله يوفقك ويسعدك يارب 💕 + الي عنده تجربة او نصيحة في تخصص الصيدلة لا يبخل علينا ..

ولله مقطع ممتع ومعلوماته مهمه جداً يعطيك الف عافيه يانايف ماقصرت 💙💙 مقطع عن الف مقطع.

ياشيخ الله يسعدك ويبيض وجهك كان اسعدتنا بذا الفديو اللطيف اللي يحفزك للحياه قدام

مقطع جدا جميييل ومفيد فعلا تمنيت ان مقطعك كان موجود اول ما دخلت الجامعه او اثناء دراستي فيها كان اعطاني حافز اكبر للاجتهاد ولكن الجيل التالي فيهم الخير والبركه راح انشر مقطع لاقاربي واصدقائي المقبلين على الحياه الجامعيه شكرا نايف

جميييل الفيديو جداً ولكن الله يسعدك لا تحط موسيقى لأن فيه ناس ماتسمع ودها تسمع الكلام وخاصةً برمضان يعني بس استمر قناتك جداً رائعه وانت اروع الله يوفقك يارب

الف مبروك 🤍 ، فيديو جميل و ممتع و عفوي و محفز

ياسلام عليك أخ نايف والله استمتعت مع كل دقيقة في المقطع الله يسعدك والحلو التنوع في المحتوى 👌👌 ومبرووووووك التخرج

جبيت الفيديو بشكل غير طبيعي أهنييييييك 🥺🥺حرفيا تمنيت انه كان موجود قبل أدخل الجامعه بس الحمد الله دخلنا ياناس لاتتهاونون بالثانوي ويانايف معدل الثانوي ينحسب من اول ثانوي لين ثالث مو من ثاني "تصحيح" شعور انك تجتهد في الثانوي عشان معدلك وتدخل الجامعه اللي تبيها مانسى لحظه رساله قبولي في جامعة سعود بكيت فرح الحمد الله 😭لحظة نستني كل التعب اللي تعبته وشقيته ف الثانوي وبخصوص موضوع البزنس واللي يفكر يترك دراسته عشان بزنس هذا اكبر غلط شهادتك في هالوقت هي صونك في حال انسدت الدنيا بوجهك والبزنس مامشى أقلها شهادتك عندك تدور اي وظيفه والحمد الله واجتهدوا واحرصوا على المعدل من اول سمستر في الجامعة وبالتوفيق واحلام جميلة للجميع👏👏

والله كلامك جدا جميل و٩٠% يشابه حالتي والصراحة حفزتني اشد حيلي زيادة بالدراسة

فيديو من الآخر ، مشكور على الرسالة وأنا متأكد انها بتفيدني كثير بحياتي الجامعية ، شكرااااا❤️

الفيديو بطططططل مادري اتكلم على اختيار الموضوع ولا الاخراج ولا الاضاءة ولا المونتاج تطور بطل مجهود تشكر عليه 👏🏼👏🏼👏🏼👏🏼👏🏼👏🏼

الله الله الله من وين ابدا ومن وين انتهي♥️♥️♥️♥️❤️🌹🌹🌹🌹

ماشاءالله عليك كلامك كلللله درر وصح ١٠٠٪؜ فعلاً الجامعة في زمنّا هذا مهمة صح انها كريهة لكن معليش اضغط نفسك ٤ سنوات او اكثر لكن مارح تندم على ولا دقيقة قضيتها في الدراسة وبتذوق حلاوتها اذا تخرجت ان شاءالله

ما شاء الله، الف مبروك التخخرج ودرجة البكالوريوس ،، الله يبارك لك وييسر أمرك ،، وعقبالنا يارب💛💛💛🎓🎓.

ما شاء الله يا نايف المقطع مثري وممتع وخبراتك والمعلومات اللي بذا الفديو مكسب كبير تنمنياتي لك بالتوفيق والنجاح ونشوفك من اكبر تجار الاعمال

صدقوني يالربع اكلمكم وانا الحمدالله تخرجت الترم هذا مهما يصير معاك بالجامعه خل قلبك قوي ترا هي يبيلها صبر واهم شي انك تخاوي ناس هناك ترا والله نظام النفسيات ماينفع واذا بيدك تساعد احد بشي ساعده انا ساعدت واحد اول ترم لي بالجامعه ونسيت ومرت السنين وجاء الترم الاخير وجتني ماده صعبه حيل كنت مستعد للرسوب فيها والله لو الله ثم هالرجال كان ماتخرجت هو مانسى يوم انا اساعده وردها لي بشي احسن فانا اقول اهم شي انك تخاوي ناس كفو وتترك زحف الثانوي

نصيحتي لو انقبلت بتخصص ماهو اللي انت حاطه الرغبه الاولى بحكم معدلك نازل عادي ادخل التخصص اللي ماتبيه وارفع معدلك ب اول ترم وقدم تحويل للتخصص اللي انت تبيه بكل سهوله وان شاء الله تنقبل . طبعاً هذا شي ماكنت ادري فيه وتمنيت لو كنت اعلم فيه من قبل لكن جاء متأخر جداً جداً.

الله يبيض وجهك ، والله يعينك ويسهل امرك وفالك التوفيق❤️❤️❤️❤️

صراحه كنت محتاج الفيديو من زماان شكرا ❤️

اقسم بالله استفدت اشياااء كثير و انا ذحين في الجامعة و معدلي طايح و ان شاء الله يرتفع من بعد نصايحك دعواتكم شباب.

الله يبارك فيك ومبروك لك بالمثل . ودي انصح غير اخاف انكبهم غير اقول الله يوفق من كان طموحه عالي ويبي يكمل وترا الدنيا سعه لا تتراجع عن قرار اتخذته عشان ماتندم عليه بعدين . ولايكون قرارك ضد قرار اهلك فلا توفيق الا بعد رضى امك وابوك وزاد قرارك لازم يكون منطقي وعلى حدود ذكائك وإمكانياتك وشكرا

اسأل الله لك التوفيق والسداد كلامك جميل ي نايف ما شاء الله عليك ما خليت شيء في خاطري❤️❤️🌹🌹

الله يوفقك يانايف بتفيد كثير وانا شخصيا فتحت نفسي بموضوع المعدل وصعب يرتفع شكرا لك ❤️

نصيحتي كطالبه تاخرت عن التخرج سنه : ١- لحد يدخل تخصص جديد لانه ماراح يكون فيه دكاتره ولا فيه اكثر من شعبه ولا فيه مستويات قبلك وبعدك عشان تقدر تضيف مواد .. وهذي معاناتي انا .. * الا اذا بتشد حيلك من البداااايه زيين وتمشي على الخطه وتتحمل الدكاتره كلهم لان مافيه غيرهم .. ٢- حطو المعدل قدام عيونكم وحطو لكم هدف لمعدل معين توصلون له ، انا صراحه كنت اخر شي افكر فيه المعدل كان اهم شي عندي اني اعدي الماده وبس وهذا شي خطا مانتبهت له الا في السنه الرابعه للجامعه والحمدلله قدرت ارفعه شووووي لكن مو الرفعه اللي في بالي لانه ينزل بسهوله وصعب يرتفع .. وبالاخير الوظيفه رزق مو ع المعدل والله يعوضنا خير ♥️ يعطيك العافيه يانايف حرفياً كل الكلام اللي قلته بالمقطع كان في خاطري .. 27 دقيقه مرت وانا مستمتعه بكل ثانيه فيها ومبروك التخرج لنا جميعاً ويارب نشوفك باعلى المناصب ♥️🎓

بالنسبة للنادي الطلابي يحسن علاقتك مع الدكاتره ورئيسة القسم عن تجربة 😍👍🏻

الله يجزاك الجنه اخوي نايف .. وربي يوفقك في حياتك الدنيويه والاخرويه .. 🤲👍

ماشالله عليك الف مبروك والله فيديو مؤثر واستفدت كثير منه وان شالله منها للأعلى

بغض النظر عن أهمية الموضوع المتشعب ذا وعن جمال القصة وعن مكان التصوير وروقانه .. أسلوبك وسردك كان الأجمل والله وصلت الدقيقة ١٩ واطالع اكتشفت ان الفيديو ٢٧ دقيقة، ماحسيت بالوقت !! مقطع جميل لاتحرمنا من زيه وشخصيتك الأجمل تحية من القلب مع تمنياتي لك بالنجاح في كل خير تقدم عليه ❤🌹

استفدت من المقطع وحمستني وانا رايح ثاني ثانوي 👍🏻يعطيك العافيه

الله يسعدك ❤️ والله العظيم اني استمتعت واستفدت من الفيديو 💜 والاستديو رهيب 😹 العمر كله، 😹💜💜

الله يجزاك خير كلام مهم جداً ومفيد وأنا متأكد إن شاء الله إنك افدت ناس كثير ونشكرك على المحتوى ومقطعك يستاهل اللايك👍👍♥️♥️

الف مبروك التخرج والله يوفقك في حياتك العمليه .... سرني الفديو جدا خلاني اتذكر كل نقاشاتنا في تلك الفتره واسترجعتهاكلها ما أسرع الايام ...الله يوفقك ويحفظك .... سرني جدا وفائك لزميلك فهد العيباني....الله يغفر له ويرحمه ويتجاوز عنا وعنه طبعا عرفتني اكيد😁

الحمد لله باقي سنه او اقل في الجامعه واخلص ♥️ صراحة اجمل مرحلة بس ما اقلكم اني اكرهها بنفس الوقت بس مرحلة فخمة بكل ما فيها والله يرزقنا وياكم بالمستقبل الطيب والرزق الحلال لالالالالالالايك تكفووووون 👍🏻👍🏻♥️♥️♥️

مبدع صديقي ..... افكار متسلسلة مرتبة ..... الهام فوق الخيال

الف مبروك لتخرجك وبالتوفيق لك ومنها للأعلى دائما ان شاءالله 🌹🌹

جميييل الطرح كفيت ووفيت دخلتني جو انا مريت بنفس مرحلتك باختلاف الظروف ونفس الشي تخصص نظم وسالفة رياضيات 2 بتحضيري سالفه كنت ادعي بس انجح فيه ونفس الشي اخر ماده بتحضيري مع اللغة الانجليزيه وحمد لله عديته . طبعا لغتي كانت كويسه ماعانيت من ناحية اللغة بس الي لغته ماش انصح انه يطورها قبل يدخل الجامعه لانه هاذا له دور كبير بسنه التحضيريه وتحدد اذا بتدخل كليتك . واعيد اشدد على نقطتك زملاء الجامعه احسنو اختيارهم خصوصا من نفس دفعتك لانه بتضطر تشتغل في قروبات فالأفضل تتعرف او تتعرفين على مجموعه كويسه .

برنامج من الصفر من تقديم نايف سويلم😂👍

حفظت المقطع بالمفضله وباذن الله بكون شاد حيلي ويعطيك العافيه ي نايف وم قصرت💛💛💛💛

والله شكرا ياراعي القناه اقسم بالله الفيديو حقك استفدت منه كثير وانا ان شاء الله بخش الجامعه والفيديو حقك استفدنا منه كلنا وتحياتي

ذا الكلام كنت اسمعه واقول سوالف يارجال لين تخرجت من الثانوي معدل يعني بس ولا جامعه قبلتني في الرياض دخلت جامعه شقراء ( تغربت ، اكلت تبن ) والجامعه نفس النظام كللله سوالف مافيه شي اسمه ذاكر وارفع معدلك وذا تخرجت بعد ٤ سنوات ونص تخصص علوم حاسب من ٢٠١٨ وانا عاطل طموحي بس كاشير ولا مبيعات في اي الشركات ؟ طيب تخصصك ياكبتن التخصص ما افهم في شي اقسم بالله اني ندمان اشد الندم تكفون ياعيال ذاكرو اضغطو على عمركم عيشو حياه كريمه لكم . خصوصا حقين الثانوي واللي داخل الجامعه الله يرزقنا ويرزقكم بخصوصك يانايف توك تتخرج 🤣 من يوم عرفتك وانت بالجامعه 🤣 مبرووووووك

"لو كانت المعلومات تغير حياة البشر لكانوا نحفاء واثرياء" ليسلي براون . قلت: الشيء الذي لا يشاركه صانع محتوى أو متحدث تحفيزي أو صاحب صنعة /التجربة لو كنا اهل كرم لاكرمنا الناس بحسن النصيحة والتجربة الناجحة .. شكرا لك يا نايف وجزاك الله عنا كل خير ..

حلوه فكرة التنويع في قناتك وللأمانة الفيديو ممتع جدا ♥️

الله يجزاك بالخير كثير طلاب يحتاجون زي هاذي النصايح اهنيك اهنيك

بيض الله وجهك يا نايف انا رايح لثالث ثانوي قدامي سنة لكن احس فتحت مخي على اشياء لازم اني اراجع نفسي فيها وارسم خطتي ما اروح على عماها

نصيحة من طالبه في 2 جامعة : 1-القدرات اهم شي ذاكرو التجميعات حاولو تغطو اكبر قدر منها 2-وزي م قال نايف صادق الدوافير حتى لو انت مو دافور بيشجعونك ❤ 3-اجتهد واتعب على نفسك الحياة صعب تواجهها بدون شهادة 4-تذكر ان الحظ يصادف المستعدين يعني اذا انت متخرج من الثانوي بنسبة حلوة ممكن تلاقي منح ممولة ومستقبل افضل 5-تابع قناة zAmerican عشان تطور الانجليزي حقك 6-اذا قابلتك ماده صعبه مثل ماقال نايف لاتكابر وروح لدكتور يشرحلك لاتضيع وقتك 7- ذاكر اول بأول لاتراكم شي عليك وربي يوفقكم ❤

شكراً نايف على المحتوى الجميل❤️❤️❤️❤️

الله يوفقك ويسعدك يانايف وعقبال ١٠٠ عام يارب⁦♥️⁩.

اقسم بالله ٢٧ دقيقه راحت حسيتها دقيقه شكراً على المقطع ي نايف .

نصيحه لاي شخص من مجرب حاول حاول بقدر المستطاع انك تجيب فوق ٩٠ بالقدرات و التحصيلي ، لاني انا بجامعة الجوف و لما اختبرت القدرات و التحصيلي ما شديت حيلي حيل ، لكن جبت النسبة اللي تدخلني تحضيري و قلت ان شاء الله اشد حيلي بالتحضيري ، و الحمدلله شديت حيلي و جبت ٥/٥ لكل الترمين و هنا انا استانسة حيل بسبب اني اقدر اختار اي تخصص ابغاه بدون خوف ،لكن لكن لكن حدث شيء غير متوقع الا وهو بسبب كورونا قررت الجامعة انها تغير آلية التخصيص و انها تأخذ ٥٠٪؜ من القدرات و التحصيلي و الثانوي و ال٥٠٪؜ من معدل الترم الاول فقط ، و هنا الصدمة نزل معدلي الو ٤.٦٣ حرفيا ما استوعبت اللي صار لي و كل هذا بسبب اني ما اعطيت القدرات و التحصيلي حقهن ، والحمدلله صار اللي صار و عملنا بالاسباب ، اتمنى من اي شخص في اي اختبار تدخله حاول تجيب كاملة حاول و لا تستهين بأي شيء نصيحه . دعواتكم ❤️❤️❤️

جميييلللللل جميييييللل الفيديو ومفيد جدااً وحتى طرحك لتجربتك سلس وجميل جددد 27دقيقه مرت ولا حسيت فيها جد الله يوفقك على هالمعلومات ابدعت 💞💞

استمتعت جدا وانا اسمع تجربتك مع اني عديت مرحلة الجامعه الحمدلله ،، مبروك الخرج 👏🏻👏🏻❤️

اهداء مني الى الطلاب او الطالبات خريجي الثانوي انا لي سنتين فالجامعة رايح الحين مستوى خامس اروجكم تسمعون نصايح وان كانت قليله بس ذكرت الاهم اول نصيحة: لاتستهين فادرجات ترى الدكاتره ماراح يسعدونك كل الي تجيبه من درجات راح يرصدلك حتى لو تاخذ صفر النصيحة الثانية :لازم تتعلم او تتعلمي اللغة انجليزي لازم يكون مستواك متوسط او ممتاز لازم لازم لازم تتعلم اللغة النصيحة الثالثة :اي مادة صعبه رح للدكتور او تجيب مدرس خصوصي يشرحها لك لاتسوي نفسك فاهم كل شي النصيحة الرابعة :لاتحذف مواد ولا تضيف مواد امش او امشي مع الخطه حتى لو قالك او قالكي احد ترى الدكتور او الدكتوره معقدين واسئلتهم صعبه وووو لاتسمعون كلامهم. النصيحة الخامسة : خلك اجتماعي او خليكي اجتماعيه لاتسووون نفسكم نفسيين لان ماحد بينفعك او ينفعكي بعد الله هم يساعدونك في واجب او ملخص اختبارات او اسألت اختبارات السنه الي راحت حقت الدفعة الي قبلكم ترى الدكاتره مراح يغيرون الاسئله حتى فانهائي ان غير يمكن يغير في سؤال او سؤالين مراح يغير الاسئله كامله و بل ختام اسئل الله ان يوفكم ويسهل دربكم. ومثل ماقال الشاعر ( من بغى الدح ماقال آح ) وبالتوفيق

يعطيك العافيه على النصايح انا قاعد احاول في نفسي اني اكون ايجابي بشكل كبير لاني ضيعت للاسف ٤ سنين مابعد الثنويه والحين توي مخلص تحضيري احيان افكر متى بتخرج وكم بيكون عمري ويضيق خاطري لاكن استمتعت بنصايح الناس فالتعليقات ونصايحك ي نايف شكرا للجميع على الايجابيه اللي تكتبوها وانصح اللي توه متخرج ادرس لاتقعد جالس ترا حياه الجامعه والله سعه صدر وفله لاتضيع عمرك والله يوفقكم جميع وييسر اموركم وتتحقق امانيكم يارب .

الف مبروك التخرج يانايف و عقبال منها للأعلى ان شاء الله الله يوفقك ❤

وش هالفيديو ! يا اخي تبارك الله عليك افدتني مرة اشكرك ❤️

السلام عليكم انا ولله للحين ماخلصت المقطع لكن ولله صدفة قوية صراحة كانك وانت تتكلم تسرد قصتي انا المفروض سنه ثالثه في جامعة قطر تخصص نظم معلومات ادارية لكني تاخرت سنة

انا حمدالله خريج تخصص نظم معلومات ادارية واتوقع اني سابقك بسنتين تخصص جميل صراحة ومستقبله حلو وحالياً متوظف حالياً في امن المعلومات ، بس انصحك بالشهادات الاحترافية حالياً خصوصا من بدري مثل CCNA واذا تميل لسكيورتي security+ وفيه غيرهم كثير وتعتمد عليك وش تبي تتوجه فيه وتركز عليه كتخصص لك تتوظف فيه وبالتوفيق للجميع

ياشيخ الله يسعدك ويوفقك يالله انك توفقه من سمعت مقطعك انت غيرت حياتي بشكل !!

أشوف انه ارهب مقطع قد سويته انت بحياتك صراحة قعدت اطالعه وما مليت حتى من الحديث، السيت اب جميل جدا ومريح للعين، الموسيقى اللي مع كلامك متناسقة، جمعت بين خبرتك ومواقف طريفة لك بالجامعة، ببساطة فيديو عظيم وخذ احلى لايك

جميل بس ليتك ما حطيت الموسيقى أخوي نايف ❤️

يا الله شقد اعطيتني دفعة معنوية ب الوقت الصح بما اني خريج ثانوي احس اعطيتني حماس لدراسه و الحمدلله كنت ادور وابحث عن المعلومة المهمة ف الجامعة الصراحة م ادري وين ابدأ في كلامي لك لانك جد فتحت مخي ع اشياء كنت انا م اعرفها وغافل عنها🥺💙💙💙 الصراحة شكرآ ع المقطع الي يشبه لك لبى قلبك احس هذا المحفز الي احتاجة صح اني ندمت ع اشياء اهملتها ف الثانوي لكن انت خليتني انسى الماضي وابدأ افكر للحاضر وللمستقبل يعني علمتني ع اشياء مرره بتساعدني ويستفيد منه صدقني لين حسيت اني طفشت وتعبت من الدراسه باخذ جرعة حماس من المقطع حقك عشان ارجع اقوى من اول يعني مدري شقول لك لكن شكراً ع المقطع الي مستحيل تمل من كل ثانيه تشوفه كل ثانيه تقولي اتحداك تطلع من الفوائد الجوهرية الي يعطيك اياها الصراحة اعترف كنت شوي بايعها ب الثانوي لكن الحين اتوقع اني مستعد لدراسة واذا م استعديت اشوف جرعتي الحماسيه من المقطع الفخم..ربي يسعدك ويوفقك والله لا يضرك شي والله يطول بعمرك يارب ويارب اشوفك ونشوفك يا محبينك بخير ومن اسعد الناس يارب.🥀♥️♥️♥️✨ وايه نسيت اقولك الف الف مبروك التخرج ويارب يوفقك ف مبتغاك يارب🙏🏻♥️♥️♥️.

يعطيك العافية عالفديوا و مبروك عالتخرج ❤️

ما شاء الله مقطع جميل جدا ي نايف تشكر عليه 🌹

قصتي بختصار.. ايام التقديم الورقي خذ ملفك ورح للجامعة، هدفي تربية خاصة "لاسباب شخصية واهتمام" الكراسي محدوده، اخر كرسيين اخذوها ناس بالطابور معي واسمعهم والله سمعتهم يقولون "وش التخصص الزين؟! قاله خويه يقولون تربية خاصة حلوه وش رايك ندخلها؟" والله انهم مايدرون ايش التخصص وصافين طابور ولا يعرفون وش يدخلون! "هالكلام قديم الناس ماتعرفه" وتنقفل الابواب بوجهي، وماقدرت ادخل بكل الطرق ،قالوا لي ادخل اي شي وننقلك عطول قبل بداية الدراسة، وادخل لغة عربية تراخيت ع اساس انهم بينقلوني ويروح الترم الاول بلا حصيلة نهائياً ، حاولت امشي مشيت ترمين ثلاثة معدلي كويس بس الرغبة صففر! بحثت عن جامعة ثانية و جاني وعد شفهي اني ممكن اقُبل! كان الوعد اشبه بالقشه اتشبث بها، ومرهون باحضار ملفي اللي بالجامعة الاولى، جازفت سحبت ملفي معناته طي قيد!! ممكن تجلس ببيتكم ترا.. لكن توكلت على الله و اخذته ومن بكرة وانا بالجامعة الثانية والحمدلله ماتعرقل الموضوع وسجلت، لكن للاسف كان ضايع من عمري سنتين ونص تقريبا بسبب الجامعة الاولى كان مابين حذف و دراسة و و، الجامعة الثانية مواقف كثيرة بديتها باحباط كبير لاني بديت من الصفر! احباط كان مؤثر بحضوري و غيابي وتأثرت كثير ترم و ترمين وحذفت و و، ولكن بعدها استعدت قوتي ومعدلاتي الفصلية من بعدها ماتنزل عن 4ونص او 5 الا شوي ، صحيح المعدل التراكمي ماكان مرة مشجع ،لكن بالمقابل انا جالس اسوي اللي علي و اجتهد وعرفت الدرب متأخر لكن عرفته والحمدلله، وتخرجت من هذا كله عام 39 ،قبل سنتين... اجتهدوا من البداية ممكن تختصر سالفتي اللي مادري هي ست او سبع سنوات، لاربع او خمس سنين و بنتيجة مرضية وعالية بمجرد انك تجتهد شوي

الموسيقى حرام + مزعجة

الصراحة كلامك ثمين الله يجزاك خير ويكتب أجرك على هالتوجيهات ♥️✨

شكراً شكراً شكراً ؛ خليتني أعيد حساباتي، الإضائه بطله

أفضل ٢٧ دقيقة في يومي هذا .. فعلًا أنت شخص ناجح ومكافح ، ماعاد نبي مقاطع أكل كل يوم بربر علينا 😂♥️♥️ قصتك مشابهة لقصتي إلى حد ما؛ فأنا أيام التقديم للجامعة كنت أجهل الكثير من المعلومات وطرق التقديم وللأسف ماستعنت بأحد، المهم كانت درجاتي في القدرات والتحصيلي جميلة جدًا ولكن ماعرفت طريقة ترتيب الرغبات وحطيت أول رغبة تخصص ماكنت أبيه المهم على طول قبلوني وانصدمت صراحة وأهلي انصدموا أكثر إني داخل هالتخصص!! ، مالك بالطويلة دخلت هالتخصص وحاط ببالي إني بشد حيلي على شان أحول الترم الجاي على طول حتى يعني ماكونت صداقات كنت كاره اللي فيه وكاره حياتي وكملت هالترم التسليكي وقابلت لي واحد قلت له أنا دخلت بالغلط وبحول التخصص الفلاني قعد يضحك ويقول احلق شنبي أن حولت وعطيته ضحكة تسليكية وخلصت ذاك الترم وحولت تخصصي اللي أبيه والآن معدلي ٤.٨٦ ولله الحمد . عاد حاولوا تطلعون فايدة من كلامي تعبت وأنا اكتب

الموسيقى ابدًا مالها داعي .. ليتك تستبعد الموسيقى من مقاطعك يا نايف جزاك الله خير

مبروك نايف ما شاء الله❤️❤️❤️❤️❤️

والله مبدع وكلام من ذهب🙋🏻‍♂️❤️

الف مبروك التخرج وعقبال الوظيفة ومايمنع معها بزنس ،، ( تجربتي انا ) متخرج من الجامعة قبل ٤ ونص ، ولو رجع الزمن ما اخذت تخصصي اللي كنت فيه ، لان الاوضاع قبل كانت غير وتخصصي كان مقبول ، لكن حالياً الوظايف ما تتوجه له كثير واصبح شبح محصور ، عشان كذا انا الى الان ما تعينت + معدلي نازل وهذا عنصر اساسي ،، نصيحتي للي قريب بيدخل جامعي يشوف التخصصات المميزة واللي بادية الدولة تتوجه لها .. وبالتوفيق للجميع

١٤٤٣/١/١٤ ما شاء الله حمستني على هالتخصص بعد ماجاني قبول فيه تم قبولي هالسنه في تخصص Management information systems احس اسمه بالانجليزي فخم😂💔 نظم المعلومات الأداريه وان شاء الله اجيب درجات عاليه انا واخواني واخواتي الطلاب والطالبات ونتخرج بالمعدل الي نتمناه وبإذن الله يكون فالنا التوفيق جميع♥️ والسلام عليكم ورحمة الله وبركاته😂

يالله والله ان هذا المقطع جاء في وقته بحكم اني ماعرف عن الجامعة اي حاجة مررهه شككراً نايف ♥️

اولاً الف مبروك واتمنى لك النجاح في حياتك ... اسلوبك جميل والسبب عفويتك وعدم تكلفك .. استمر ياغالي

اهنيك ع المقطع الجميل من جد استفيدو عشان لا تندمون بعدين... انا من الناس اللي دخلت الجامعة وماكان عندي اي فكررة عنها او ايش هي الجامعة ولا حتى اعرف وش التخصصات اللي كانت موجودة فيها صدق صدق تمنيت ان كان فيه احد ينصحني او يفهمني ايش هي الحياة الجامعية وكيف راح تكون ولا حتى كنت اعرف ان التخصصات اللي راح ادخلها تتطلب معدل معين🥺💔 طبعاً درست السنة التحضيرية بدون اي هدف وحملت نص المواد بعد كذا دخلت تخصص ما كنت احبه ابداً واللي حواليني كانو يشجعوني وكنت اكمل عشانهم بس انا فالواقع كنت اعاني كثير وماكان احد يفهم هالشي التخصص كان صعب ولا افهمه كملت 5 سنوات وكان باقي لي مواد كثيييير لأن ماكانت تتسجل لي بالترم الا مادتين الى خمس مواد كنت اعاني وكان فيه مشاكل كثير ومنها اللغة الانجليزية كنت ضعيفة فيها بالنهاية ما قدرت اتحمل وانسحبت من الجامعة 🥺💔💔 اتذكر اليوم اللي رحت فية الجامعة اخلص اجراءات الانسحاب كان اصعب يوم مر علي بحياتي كنت احس بغصة ☹️💔بس كنت مقتنعه ان هذا قراري خلاص لكن الحمدلله ماوقفت دراسة دخلت دبلوم بتخصص موارد بشرية وحبيت جداً هالتخصص طبعاً هذا اخر سمستر لي بإذن الله 😍♥️ وايضاً اخذت دورات بشهادات معتمدة كثيييييير بنفس التخصص وغير التخصص مثل تطوير الذات وشغل اوقات الفراغ والعلاقات الاجتماعية وغيرها وناوية اخذ اكثر ماراح اوقف ماتتخيلون قد ايش تغير فيكم هذي الدورات وتستفيدون منها كثير بحياتكم وصدقوني راح تدمنونها ما راح توقفون🤩♥️♥️♥️