Təbiətin bəxş etdiyi unikal imkanlar və tarixi abidələr Qax rayonunu ekoturizm üçün əlverişli məkana çevirib. Rayonda müalicə, istirahət turizmi daha geniş yayılıb. El arasında hamının “İlisu hamamı” kimi tanıdığı termal və müalicəvi bulaqların yerləşdiyi məkan Böyük Qafqazın tam ətəyində, iki tərəfi sıldırım qayalıqların arasında yerləşir. Ağçaydan başlayan yol Hamam çayın vadisi ilə davam edir. Ziqzaqlı çığıra bənzər yollar, bəzən də qaya daşlarının kənarı ilə keçidlər hər an təhlükəlidir.
Dəniz səviyyəsindən 2400 metr yüksəklikdə yerləşən Hamam dərə vadisinə getmək üçün 5 km maşın, 2 km isə piyada yol qət etmək lazımdır.
İlisu termal suları ilk dəfə 1866-cı ildə tədqiq olunub. Məlum olub ki, hamam daxilində yerdən çıxan termal, kükürdlü isti su çox böyük müalicəvi əhəmiyyətə malikdir. Suyun çıxdığı oyuq ön tərəfdən hörülərək hovuz halına salınıb və vanna qəbul etmək üçün istifadə olunur.
qayaların içində ovularaq hazırlanan hamamlarda suyun temperaturu 38 dərəcədir. Bələdçilərin sözlərinə görə hər gün 3 dəfə olmaqla 15 dəqiqə kükürdlü suda yatmaqla revmatizm və digər xəstəlikləri müalicə etmək mümkündür...
İlisu Dövlət Təbiət Qoruğu bazasında yaxın bir ildə yeni layihələrin icrası, termal bulaqlarla bağlı xüsusi işlərin görülməsi nəzərdə tutulur. Milli Park layihəsi reallaşan kimi burada turizmin müxtəlif istiqamətləri üzrə layihələr təqdim olunacaq.
bol mineral su ehtiyatlarının varlığı rayonda iqlim-balneoloji kurort zonalarının yaradılmasını zəruri edir.