Қала мектептерінде оқушыларды ыстық тамақпен қамту сапасы сын көтермей тұр. Шәкірттерге жарамдылық мерзімі өткен өнімдер ұсынылған. Тіпті тыйым салынғандары да бар. Ал тамақ рационы нормаға сәйкес емес. Бұл мәселе қалалық мәслихаттың әлеуметтік сала және қоғамдық қауіпсіздік мәселелері жөніндегі тұрақты комиссия отырысында қаралды.
Алдымен қалалық мәслихат депутаттары №287 орта мектепте болды. Қазір бұл білім ордасына №197 орта мектептің оқушылары уақытша көшірілген. Сондықтан балаларды ыстық тамақпен қамту жайы ерекше назарға алынуы тиіс. Дегенмен депутаттар аралау барысында бірқатар кемшіліктердің бар екенін көрді. Тіпті аспазшыларға ауызша ескерту берді.
Қаладағы 18 мектепте ыстық тамақ беруді ұйымдастыру және бракераждық комиссия жұмысы зерделенген. Нәтижесінде тиісті талаптарды орындамаған кәсіпкерлер кездесіп отыр. Мәселен мектептерде жарамдылық мерзімі өткен және тұшпара, шұжық, қатпарлы қамыр секілді тыйым салынған өнімдерді пайдаланып келген асханалар бар.
Қалалық санитариялық-эпидемиологиялық бақылау басқармасының басшысы мектеп асханаларында тамақ өнімдері тоңазытқышта сақталмағанын сөз етті. Мәселен микробиологиялық зерттеу нәтижелері бойынша шайындылардан ішек таяқша қоздырғыштары анықталған.
Қалалық мәслихат төрағасы оқушыларды ыстық тамақпен қамту жайы барлық білім ордаларында депутаттардың назарында болатынын жеткізді. Ал осыған дейін орын алған кемшіліктер дер кезінде түзетілуі тиіс.
Тұрақты комиссияда жасөспірімдер арасындағы құқық бұзушылықтың алдын алу мәселесі де қаралды. Жыл басынан бері кәмелетке толмағандармен 2 қылмыс жасалған. Сондай-ақ 28 жасөспірім арнайы есепке алыныпты.
Депутаттар қос мәселеге қатысты ұсыныстарын жолдады. Алдағы уақытта комиссия бұл ұсыныстардың орындалуын қатаң бақылауға алмақ.
Сайт - qyzylordatv.kz/ru/live
Facebook - / qyzylordatv
Instagram - / qyzylordatv
Telegram - t.me/qyzylords_tv
Tiktok - / qyzylorda_tv