ലോത്തിന്റെ കാലത്ത് പത്തു നീതിമാന്മാരെപോലും സൊദോമിലും ഗൊമോറയിലും കാണാൻ കഴിയാത്തതിനാൽ ദൈവം ആ പട്ടണങ്ങളെ നശിപ്പിച്ചു. എന്നാൽ യോനയുടെ നാളുകളിൽ നീനെവേയിലെ രാജാവും ജനങ്ങളും മൃഗങ്ങളും ഒരു വസ്തുവും ആസ്വദിക്കയില്ലെന്ന് തീരുമാനിക്കുകയും ഓരോരുത്തനും താന്താന്റെ ദുർമാർഗ്ഗം വിട്ടുതിരിയുകയും ചെയ്തപ്പോൾ ദൈവം ആ പട്ടണത്തെ നശിപ്പിച്ചില്ല. അതേ, മാനസാന്തരപ്പെട്ട സക്കായിരക്ഷപ്പെട്ടു. എന്നാൽ ക്രിസ്തുവിനെ രക്ഷിതാവായി സ്വീകരിച്ചാലും ചെറിയൊരു തെറ്റ്ചെയ്താലൊന്നും ഒരു കുഴപ്പവും ഇല്ലെന്ന് കരുതിയവർ - അനന്യാസും സഫീറയും- വീണുപോയി. "മാനസാന്തരം" അതാണ് ഏറ്റവും ശ്രേഷ്ഠമായ അനുഗ്രഹം. പക്ഷേ, മനസ്സ് പുതുക്കി രൂപാന്തരപ്പെട്ടതിനു ശേഷം ക്രിസ്തുമൊഴികൾക്ക് വിരുദ്ധമായി ജീവിക്കുകയാണെങ്കിൽ അത് ആപത്താണ്. സ്നേഹിതാ, തെറ്റ് ചെയ്യാത്തവരില്ല. ആകയാൽ ഓരോ ദിവസവും രാത്രിക്കാലങ്ങളിൽ അന്നേ ദിവസം നമ്മൾ ചെയ്ത തെറ്റുകൾ ദൈവത്തോട് ഏറ്റുപറയാം. പിന്നീട് അത്തരം തെറ്റുകൾ ആവർത്തിക്കാതിരിക്കാം. ഇനി അതിനുള്ള കൃപയ്ക്കു വേണ്ടിയാകട്ടെ നമ്മുടെ പ്രാർത്ഥനകൾ..... അതേ, "അന്നു മുതൽ യേശു: സ്വർഗ്ഗരാജ്യം സമീപിച്ചിരിക്കയാൽ മാനസാന്തരപ്പെടുവിൻ എന്ന് പ്രസംഗിച്ചുതുടങ്ങി" മത്തായി 4:17 എന്ന വചനം നാം ഒരിക്കലും മറക്കരുത്.....
#വിശ്വാസജീവിതയാത്ര