「當面講有，背住我講都有，佢哋話『你姓向，好惡個喎！你屋企會員十幾萬人，每人同你買張意外（業績）都第一啦！』」
向展鵬Jeffrey是保險公司資深區域總監，對上一次出現在新聞是在娛樂版，新聞的標題是「林作做保險有向氏家族成員撐腰 連跳幾級坐總監房
」。
對。這個「向氏」，便是那個「向氏」。「我爸爸（向華榮）排行第四，係最低調嘅一個，朋友都唔同。佢話，我哋個姓好感敏，揸車都要小心啲，因為一有事，你全版家族圖又出嚟㗎啦！」
「我小學讀喇沙，有個同學同我好Friend，有一日佢話『向展鵬我唔可以同你玩啦，我阿爸阿媽唔俾，佢話你哋屋企唔正當』，嗰個年代一講姓向，啲人驚咗我。」
及後赴英升學，回港任職保險公司，身邊同事最留意的仍是他的姓氏。「我做咗保險24年，頭四年美國公司，不停俾人攻擊，佢哋話『呢個人唔駛做，姓向，屋企會員十幾萬，每人同你買張意外都第一啦』。真嘅，真係咁同我講，有啲話『你姓向，尖沙嘴好似你哋屋企地頭，食嘢唔駛錢，幾時請我哋去食嘢？』全架𨋢嘅人都聽到」。
龐大的家族對業績有沒有幫助？「我哋家族嘅人都唔信保險，咁多年嚟買嘅單唔夠5張，最大嘅一張單都係13萬。」
「我係一個好懶嘅人，一路升職係因為唔想再俾人搞。」保險同事會如何「搞」人？「佢哋會唔俾我請人，或者炒我請返嚟嘅人。」
2020年，是向展鵬最高調的一年，「唔高調都唔得啦，我只係帶咗佢睇一晚港姐，突然間幾十個記者，一見到林作同佢女朋友就係咁影相！」不單止帶林作到港姐競選現場，向展鵬早於年頭已招攬林作為其下線，不料當晚引起極大反應。「第二朝起身好多Message，有英國同事、朋友，我睇完嗰堆嘢，三日唔敢出街，我好低調㗎！從來都冇諗過俾人起晒底！」向展鵬笑說，原本計劃幫林作宣傳其保險事業，及後已告放棄。
說到林作轉行，有江湖傳聞指，林作媽媽講過，保險只可以跟一個人，便是向展鵬。「冇錯，真係嘅，因為佢覺得我個人比較老實。」林作又是否如報道所指，越級坐總監房？「佢嗰間唔係總監房嚟嘅，係佢用啲Wide啲嘅鏡影到好大咁啫！」他指林作並非如傳聞中「咁串」，「有一樣嘢好欣賞，佢同同事講嘢，從來唔會中英夾雜。」林作亦不負所望，入職後幾乎每個月也打入業績榜，「據我所知，佢簽嗰啲都係細單嚟」，意思是他沒有靠「母幹」，頻頻上榜是努力之故。
「初頭有啲同事知道我請咗林作，佢哋話『好多人憎佢個喎，你請咗佢你會好麻煩』，我同個同事講『佢麻唔麻煩我唔知，我而家覺得你好麻煩』。」
#向氏 #保險 #向展鵬 #沈大師講投資 #騰訊 #內銀 #恆指 #投資股票 #期貨 #期權 #外匯 #衍生產品
【訂閱港股策略王KZfaq頻道，隨時重溫我哋所有節目!】
bit.ly/2KYxkVy
【即上港股策略王官方網站，接收即時財經新聞資訊!】
hksmedia.com
【港股策略王手機apps全新上架，想第一手接收我哋既新聞資訊，即刻黎下載!!】
IOS: apple.co/2KXphs6
Android: bit.ly/2IsiHu8