Рет қаралды 29,552
ንዒ ኀቤየ ኦ ድንግል ምስለ ወልድኪ ፍቁርኪ ኢየሱስ ክርስቶስ ከመ ትባርኪ ለዕሌነ።
ንዒ ኀቤየ ኦ ድንግል ምስለ አዳም ወአቤል ሴት ወኄኖስ ቅዱሳን አበዊሆሙ ለቀደምት ዕደው ስሙያን።
ንዒ ኀቤየ ኦ ድንግል ምስለ ሄኖክ ወኖኅ ወሤም እለ ረከቡ ሞገሰ በቅድሜሁ ለልዕል።
ንዒ ኀቤየ ኦ ድንግል ምስለ አብርሃም ይስሐቅ ወያዕቆብ አበውኪ እለ ወለዱ ኪያኪ ትምክሕተ ኲሉ ዓለም።
ንዒ ኀቤየ ኦ ድንግል ምስለ ሙሴ ወአሮን ካህናት ዘአስተማሰሉኪ በደብተራ ስምዕ እንተ ነበረት በገዳም።
ንዒ ኀቤየ ኦ ድንግል ምስለ ኢያሱ ነቢይ ወመስፍን ዘዐቀመ ፀሐየ በገባዖን ወከፈሎሙ ርስተ ለዕብራውያን።
ንዒ ኀቤየ ኦ ድንግል ምስለ ሳሙኤል ሳውዕ ዘደብተራ ስምዕ ዘነሥኦ ለዳዊት እመርዔተ አባግዕ ቅብዓ መንግሥት ዘቀብዖ እምቀርነ ቅብዕ።
ንዒ ኀቤየ ኦ ድንግል ምስለ ዳዊት አቡኪ መዘምር ዘኅለየኪ እንዘ ይብል ክንፈ ርግብ በብሩር ዘግቡር።
ንዒ ኀቤየ ኦ ድንግል ምስለ ኢሳይያስ ወኤርምያስ ሠናየነ ትንቢት ልዑላን ቃል ወሰባክያን ዘምስለ ኃይል።
ንዒ ኀቤየ ኦ ድንግል ምስለ ምስለ ኤልያስ ወኤልሳዕ ነቢያተ እስራኤል ወምስለ ዕዝራ ሱቱኤል ጽዋዐ ልቡና ዘአስተዮ ዑራኤል።
ንዒ ኀቤየ ኦ ድንግል ምስለ አናንያ ወአዛርያ ወሚሳኤል ትእዛዝ ንጉሥ ዘዐበዩ ለአምላከ ሰማይ ዘገነዩ ማእከለ እቶነ እሳት ዘጸለዩ።
ንዒ ኀቤየ ኦ ድንግል ምስለ ኲሎሙ ነቢያተ ይሁዳ ወሰማርያ ወባቢሎን በእንተ ወልድኪ እለ ከልሁ ከመ ቀርን።
እዌድስኪ ኦ ድንግል በከመ ግብርኤል መልአክ እንዘ እብል ቡርክት አንቲ ወቡሩክ ፍሬ ከርሥኪ።
ተፈሥሒ ኦ ምልእተ ጸጋ እግዚአብሔር ምስሌኪ ቡርክት አንቲ ወቡሩክ ፍሬ ከርሥኪ።
ተፈሥሒ ኦ ሙኀዘ ፍሥሓ ቡርክት አንቲ ወቡሩክ ፍሬ ከርሥኪ
ከምሥራቀ ፀሐይ ቅዱስ ተክለ ሃይማኖት ቤተ ክርስቲያን, Alexandria, VA