Son illər sahibkarlığın inkişafına dövlət tərəfindən göstərilən diqqət və qayğı təsərrüfatla məşğul olanlara böyük stimul verib. Bundan ruhlanan Zeynalovlar ailəsi də Salyanda qeyri-ənənəvi sahələrdən biri olan tutuquşu təsərrüfatı yaradıb.
Hər gün bir neçə dəfə tutuquşulara baş çəkir, onların vaxtında dənini, suyunu verir, yerlərinin təmizliyinə xüsusi diqqət yetirir. Söhbət Salyanın Kürqaraqaşlı kəndində yaşayan Zeynalovlar ailəsindən gedir. Ailənin üzvü 27 yaşlı Bəhruz Zeynalov artıq yeddi ildir ki, tutuquşu saxlamaqla məşğuldur. İxtisasca diş texniki olan təsərrüfat sahibinin dediyinə görə, əvvəlcə 2 cüt tutuquşu alıb. Üç il müddətinə kimi quşların sayını artıraraq 15 başa çatdırıb. Gəlirli sahə olduğundan ailə biznesini qurmaq istəyən Bəhruz Zeynalov təsərrüfatını genişləndirmək niyyətində olub.
İdeyası bəyənildiyindən 2 aylıq təlimə götürülüb. Bu müddətdə biznesin qurulması, genişləndirilməsi yolları öyrədilib. Sonra əlavə 200 baş tutuquşu verməklə ailə həm də lazımi avadanlıqlarla təmin olunub. İndi Zeynalovların təsərrüfatında 250 baş tutuquşu saxlanılır.
Korella və Valnis növlərini saxlayan Bəhruz deyir ki, bir cüt tutuquşunu 30-60 manata satmaq mümkündür. Bu da olduqca sərfəlidir. Hətta növündən asılı olaraq 1000 manata satılan tutuquşuları da var. 300 növdən çox olan tutuquşular 15 ildən 80 ilə kimi yaşayır. Amma bu quşların saxlanılmasında da özünəməxsus çətinlikləri var. Təsərrüfat sahibi deyir ki, tutuquşuların yem rasionuna da diqqət yetirilməlidir. Quşlar gün ərzində 4 dəfə yemlənməli, onlara daha çox qarabaşaq, həmçinin bişmiş düyü verilməlidir. 2-3 həftədən bir isə yerləri təmizlənməlidir. Öz ailə biznesini quran Bəhruz Zeynalov gələcəkdə böyük tutuquşlar alıb təsərrüfatını bir qədər də genişləndirərək daha çox gəlir götürmək niyyətindədir.