"Аман жүрші, жақсы адамым"
авторы: Санжар Ғұлама
оқыған: Қалыбек Гүлзат Сейітбекқызы
АМАН ЖҮРШІ ЖАҚСЫ АДАМЫМ...
Өмір сіздікі,
Басқалар не демейді,
Алып таста көзіңнен көлегейді.
Бай күніңде жаныңнан табылғандар
Жәй күніңде пысқырып елемейді.
Жігерсізге тосқауыл - тығырық тек,
Көп алдында тұрмашы кібіріктеп.
Досқа күлкі, дұшпанға таба болмай,
Құлай қалсаң,
Тұр дағы жүгіріп кет.
Өзің айтшы,
Құдай-ау, кімнен кемсің?
Айналаңа нұр шашқан Күнмен теңсің.
Жеріне сал өресі төмендерден,
Жеңіле сал,
Сыртыңнан күлген жеңсін.
Биік тұршы өресі төмендерден,
Сені сөз қып рахатқа бөленгеннен.
Көңілі сынық досым, жақын келші,
Жан жараңды жазайын өлеңдермен.
Күншілдерге мән берме, көңіл бөлме,
Көңіл кеңде байсың ғой, төрің кеңде.
Ақ пен қара, айнам-ау, қатар жүрер,
Безінбеші соған деп өмірден де.
Жанын мүжіп жатқан бір жансың текке ой,
Өмір барда мүмкіндік, шансың көп қой,
Көктем күндер күтеді алда сені,
Өткен күндер өткенде қалсын деп қой.
Мүмкіндік көп өмірде тірі жанға,
Әр ісіңнен сабақ ал құрығанда.
Қорламауды үйренші қанішерден,
Ұрламауды үйренші ұрыдан да.
Мән бермеші күншілдер тақса да мін,
Ұсақталма сен оған, ақсамағын.
Сынақтардан сүрлігіп келе жатқан,
Аман жүрші, жайсаң жан, жақсы адамым.
Санжар Ғұлама