Рет қаралды 526,239
Алматыдағы Ұлттық Қауіпсіздік Комитетінің шекара академиясы бес бірдей әскери азаматын ақтық сапарға шығарып салды. Полковник Андрей Кабдинов қаладағы контртеррористік операция кезінде оққа ұшқан. Ал, капитан Жандос Жағалбаев, курсанттар Жайық Әділхан мен Дәулет Жұпарбеков және Мейірхан Бітім академияға жасалған шабуыл кезінде қаза тапқан. Бейбіт күнде оққа ұшқан марқұмдардың ең кішісі небәрі 19 жаста.
Сарбаздарды ақтық сапарға шығарып салу орнына бес бірдей әскеридің табытын әкелген сәтте - «ботақаным» деп ұлының сүйегіне жүгірген аналарды әскерилер тоқтата алмады. Баласының табытын құшақтай жылаған ана мен бауырының өлі денесінің қасында солқылдап жылаған ағасын, «батырым» деп жылай-жылай дауысы қарлыққан әкені ешкім жұбата алмады.
Академияға жасалған шабуыл кезінде өткізу-бақылау пунктінде атыс болған. Сол кезде оққа ұшқан курсант Дәулет Жұпарбеков желтоқсан айында ғана 20 жасқа толған екен. Өзі бала күнінен армандаған оқуына түсіп, сол оқыған оқу орнын лаңкестерден қорғау кезінде қаза тапты.