Abone OL: goo.gl/W99fFm
Copyright © ARB Şəki
Sayt: goo.gl/NfKDu5
Facebook: goo.gl/XVhVzG
Qobustan rayonuna yağan güclü leysan yağışları nəticəsində əmələ gələn sel suları Qobustan və Şamaxıda fəsadlar törədib. Qobustanın 2500-ə yaxın sakini olan Poladlı kəndində evlər su altında qalıb, kənd sakinlərin təsərüfatına ciddi ziyan dəyib. Görüntülər Qobustan rayonu ərazisində qeydə alınıb. Gündüz saatlarında başlayan aramsız yağış axşama doğru daha da şiddətlənib. Rayonun Poladlı kəndində ciddi fəsadlar törədən sel evləri, həyətləri su altında qoyub. Təsərüfatlara ciddi ziyan dəyib. Çox sayda toyuq-cücə tələf olub, bostan sahələri sıradan çıxıb, meyvə ağacları,nar bağları suyun altında qalıb. Bir neçə saat yağan güclü yağışdan sonra dağlardan gələn sel suları kəndin mərkəzi avtomobil yollarını dağıdıb, küçələrdə keçilməz gölməçələr əmələ gətirib. Əraziyə gələn kənd icra nümayəndəsinin müavininə məxsus minik avtomobili isə su altında qalaraq yararsız vəziyyətə düşüb. Təbii fəlakət zamanı kəndin qaz xətti də sıradan çıxıb, elektrik və rabitə naqilləri qırılıb, kəndə elektrik enerjisinin verilişində problem yaranıb. Pirsaat çayında suyun səviyyəsi xeyli artıb. Sel suları yeni salınan körpünün dirəklərindən birini uçurub. Kənddə selin törətdiyi fəsadların aradan qaldırılması istiqamətində işlərə başlanılıb.
Leysan Şamaxıda da fəsadsız ötüşməyib. Güclü sel avtomobillərin hərəkətində çətinlik yaradıb. Rayonun mərkəzi küçələri sel sularının gətirdiyi iri çay daşları ilə örtülüb. Rayon mərkəzindəki yaşayış evlərindən birinin həyətini su basıb. Hazırda selin ziyan vurduğu ərazilərdə suçəkmə işləri davam etdirilir və digər təxirəsalınmaz tədbirlər həyata keçirilir.