Бүгін Қызылорда облысынан Қазақстан Республикасы Парламенті Сенатының шығып қалған депутатының орнына сайлау өтті. Достық үйінде өткен саяси науқанға жергілікті мәслихат депутаттары бір кісідей қатысып, өз таңдауларын жасады.
Сенат депутаты болуға үмітті 3 кандидат тіркелген болатын. Олар: Наурызбай Байқадамов, Алмасбек Есмаханов және Абайбек Жүнісов. Барлығы да өзін-өзі ұсынған азаматтар. Сайлау заңнамасына сәйкес Сенат депутаттары жасырын дауыс беру арқылы жанама сайлау құқығы негізінде сайланды. Яғни Парламент Сенатының депутатын сайлауға дауыс беруге тек мәслихат депутаттары ғана қатысты. Алдымен облыстық сайлау комиссиясының төрағасы дауыс беру ережесін түсіндірді. Сайлаушылар қатарында барлық аудандар мен қалалық және облыстық мәслихат депутаттары бар.
Айта кетейік, бүгінгі күні өңірдегі 152 мәслихат депутаты дауыс беруге құқылы болса, олардың 147-сі сайлауға қатысып, өз таңдауларын жасады.
Осыған дейін өңірден сайланған сенаторлардың мінберде көтерген мәселесі жеткілікті. Жаңадан сайланатын халық қалаулысына да артылар сенім зор. Депутаттар «Кандидаттардың қай-қайсысы болса да өңірдің ахуалын жетік білетін, елмен етене азаматтар»,- дейді.
Облыстық сайлау комиссиясы дауыс берудің алдын ала нәтижесін жариялады. Дауыс беру нәтижесімен Наурызбай Байқадамов 116 дауысқа ие болса, Алмасбек Есмаханов 17, Абайбек Жүнісов 12 дауыс иеленді. Сондай-ақ бір бюллетень жарамсыз деп танылса, бір сайлаушы «Бәріне қарсымын» деген бағанды белгілеген.
Сайлаудың өту барысын бұқаралық ақпарат құралдары мен қоғамдық бірлестік өкілдері бақылады. Ешқандай заң бұзушылық тіркелген жоқ. Сайлау комиссиясының мүшелері барлық құжаттарды қаттап, орталық сайлау комиссиясына жолдады. Соңғы шешімді орталық сайлау комиссиясы бекітеді. Онан соң заңды шаралар қабылданбақ.
Сайт - qyzylordatv.kz/ru/live
Facebook - / qyzylordatv
Instagram - / qyzylordatv
Telegram - t.me/qyzylords_tv
Tiktok - / qyzylorda_tv