Խոսնակ՝ Տեր Գրիգոր քահանա Գրիգորյան
Հոգևոր զրույց Զորավոր Սուրբ Աստվածածին եկեղեցու երիցատանը կիրակի Սուրբ Պատարագից հետո։
Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը, կարևորելով Աստվածօրհնյալ ընտանիքի արժեքը և հիմնարար առաքելությունը ազգային, պետական ու հասարակական կյանքում, 2019 թվականը հռչակել է որպես ընտանիքի տարի: Ի թիվս եկեղեցական մյուս համայնքների՝ Զորավոր Ս. Աստվածածին եկեղեցու համայնքը ևս, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, կազմակերպում է ընտանիքին ուղղված մի շարք ծրագրեր և միջոցառումներ: Հունիսի 16-ին, ընտանիքի տարվա շրջանակներում, Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը երիցատան դահլիճում հանդիպեց «Զորավոր» երիտասարդաց միությանը՝ երիտասարդների հետ զրուցելով «Սեր և սիրահարվածություն» թեմայի շուրջ: Հանդիպումը սկսվեց Տերունական աղոթքով:
Զրույցի ընթացքում Տեր Հայրը նշեց, որ շատ երիտասարդ զույգեր և նույնիսկ երկար տարիներ ապրող ամուսիններ, ճիշտ չըմբռնելով սիրո և սիրահարվածության տարբերությունը, կանգնում են ամուսնալուծության առջև: Բոլորն էլ գիտեն, որ ամուսնության համար շատ կարևոր է սերը, բայց ներկաներին զարմացրեց Տեր Հոր ասած այն միտքը, որ ամուսնանալ սիրելով՝ անհնար է: Ի պատասխան երիտասարդների զարմանքի՝ Տեր Գրիգորը բացատրեց, թե ինչ է սերը՝ ներկայացնելով «սեր» և «սիրահարվածության զգացմունք» հասկացողություններն իրենց ակնառու տարբերություններով: Երիտասարդների համար հստակ դարձավ այն, որ եթե սիրահարվածության զգացումին հատուկ է էգոիզմը, սիրահարվածությունը ինչ-որ բանի և ժամանակավոր խանդավառությունը, ապա սիրուն՝ հավիտենական լինելը, առանց ինչ-որ բանի սիրելը և ինքնազոհաբերությունը:
Սիրո մասին խոսելիս Տեր Հայրը մասնավորաբար ասաց. «Սերն ինքը զգացմունք չէ, այլ վիճակը՝ իրար միացած երկու հոգիների: Սերը երբեք չի անհետանում, այդ պատճառով իրական ամուսնությունն էլ պետք է հավիտենական լինի: «Արդ, ինչ որ Աստված միացրեց, մարդը թող չբաժանի» (Մատթ.19:6),- ասում է Տերը: Կինն ու ամուսինը մի մարմին են դառնում, ավելի հարազատ և մոտ իրար, քան՝ ծնողը և զավակը: Ծնողի և զավակի մեջ մեկ պորտ կա և նույնիսկ քրոջ և եղբոր մեջ, բայց ամուսինների մեջ` ոչ: Իսկական ամուսինը սիրում է իր կնոջը նրա համար, որ նա իր կինն է, որովհետև նրանք մի մարմին են: Եթե իրական սեր կա զույգերի մեջ, ուրեմն նրանք պետք է զգան միմյանց: Իսկական սերն անիմաստ է առանց զոհաբերության: Զոհաբերությունը դա այն է, երբ մեկը զրկում է իրեն ինչ-որ բանից` մյուսի համար»:
Զրույցն անկեղծ մթնոլորտ էր ձևավորել. մի շարք հարցերի վերաբերյալ թե՛ Տեր Գրիգորը և թե՛ շատ երիտասարդներ, իրենց կյանքից օրինակներ մեջբերելով, իրենց կարծիքները հայտնեցին: Զրույցը, ինչպես նշեց Տեր Հայրը, նպատակ ուներ ընտանիք կազմելու ճանապարհին գտնվող կամ արդեն ընտանիք կազմած երիտասարդներին ներկայացնել քրիստոնեական ամուր ընտանիք կազմելու կամ այն առավել ամրացնելու ու զորացնելու ուղիները: Ընտանիքի տարվա շրջանականերում կազմակերպված հանդիպումը Տեր Գրիգորն ավարտեց Տիրոջ հայտնի խոսքերով. «Նոր պատվիրան եմ տալիս ձեզ՝ սիրեցե՛ք միմյանց: Ինչպես ես ձե՛զ սիրեցի, դուք էլ միմյա՛նց սիրեք» (Հովհ.13:34):
Աղբյուր` surbzoravor.am/post/view/ser-e...
#սեր, #ՏերԳրիգոր, #սիրահարվածություն, #ընտանիք, #Զորավորեկեղեցի, #հոգևորզրույց