അച്ചന്റെ സുഹൃത്ത് ഫാ. അനീഷ് കൊട്ടുകാപള്ളിയുടെ വാക്കുകൾ ഇവിടെ കോപി പേസ്റ്റ് ചെയ്യുന്നു. സംഗീതം സിൻസൺ അച്ചന്റെ ജീവിതം തന്നെ ആയിരുന്നു. എപ്പോഴും പുതിയ പാട്ടുകൾ പഠിച്ചു പാടുവാൻ സിൻസൺ വളരെ ഉത്സാഹി ആയിരുന്നു. പനിക്കിടക്കയിലെ സ്വപ്നങ്ങളിൽ അവൻ മാലാഖാമാരുടെ പാട്ടുകേട്ടിട്ടുണ്ടാവണം. അല്ലെങ്കിൽ പിന്നെ നമ്മളോടൊന്നും പറയാതെ അവൻ എന്താണ് പെട്ടെന്നു പൊയ്ക്കളഞ്ഞത്. ഏതു പാട്ടുപാടിനോക്കിയാലും പ്രിയപ്പെട്ടവർക്കൊക്കെ അയച്ചുകൊടുത്തു അഭിപ്രായം കേൾക്കാൻ കാത്തിരിക്കുന്ന നിഷ്കളങ്കമായ ഒരു കൗതുകം സിൻസണ് ഉണ്ടായിരുന്നു. ഇനിയുള്ള രാവുകളിൽ പാതിയുറക്കത്തിൽ ഒരു പാട്ടിന്റെ പല്ലവി എന്നെയും തേടിവരുമെന്ന് ഞാൻ വിശ്വസിക്കുന്നു. ഇതുവരെ കേൾക്കാത്ത സുന്ദര രാഗങ്ങളിൽ മാലാഖാമാരൊത്തു പാടിനോക്കുമ്പോൾ ഞങ്ങളോടല്ലാതെ ആരോടാണ് നീ അഭിപ്രായം ചോദിക്കുക സിൻസാ. എന്നാലും ഒരു പരിഭവം ഉണ്ട്. പറയാതെ എങ്ങോട്ടും പോകാറില്ലായിരുന്ന നീ ഇത്തവണ മാത്രം മിണ്ടിയില്ലല്ലോ. പിന്നെ, ഒന്നോർത്താൽ എല്ലാം ശരിയാണ്. ആരും എങ്ങോട്ടും പോകുന്നില്ല. കുറേകാലത്തേക്ക് നമ്മൾ തമ്മിൽ കാണുന്നില്ല എന്നേയുള്ളു. ഒടുവിൽ വീണ്ടുമൊരു ദിവസം കാണുമ്പോൾ ഉണ്ടാവുന്ന സന്തോഷം എത്ര വലുതായിരിക്കും.അതുവരെ കട്ട വെയ്റ്റിംഗ്. പാട്ടും കൂത്തുമൊക്കെ അറിയാവുന്നവർ നേരത്തെ പോകുന്നത് പ്രാക്ടിസിനല്ലേ. ഞങ്ങളും വന്നിട്ടല്ലേ ശരിക്കും പ്രോഗ്രാം തുടങ്ങൂ. പൊയ്ക്കോളൂ പ്രിയ കൂട്ടുകാരാ....പല്ലവിക്കപ്പുറം പാടപ്പെടാതെപോയൊരു പാട്ടുപോലെ നീ....