Allra síðasti þáttur Spaugstofunnar verður frumsýndur á RÚV annað kvöld. Þar með lýkur merkilegum kafla í íslenskri sjónvarpssögu, en Spaugstofan hefur verið einn ástsælasti og vinsælasti sjónvarpsþáttur landsins um áratugaskeið.
Spaugstofan hefur verið starfandi, með hléum og í ýmsum myndum, frá því seint á níunda áratugnum. Á þessum rúma aldarfjórðungi hefur hópurinn gert hátt í 500 þætti. Og nú er komið að þeim síðasta.
Andspyrnuhreyfingin
Í Andspyrnuhreyfingunni fer gamalkunnug sveit ástsælla karaktera úr Spaugstofuþáttunum á merkilegt flakk í lítilli Volkswagen bjöllu. Markmiðið er að upplýsa í eitt skipti fyrir öll hvað þjóðin lærði af hruninu. Með sérútbúnum njósnatækjum skyggnist sveitin inn á ýmsa staði, m.a. Bessastaði, Ráðhúsið og Alþingi. Förin reynist forvitnileg í meira lagi og kemur það á daginn að hún er alls ekki hættulaus.
Þátturinn er á dagskrá RÚV laugardagskvöldið 23. janúar, kl. 19.45.