Рет қаралды 741
Füsnkar təbiəti ilə insanı heyran edən Gədəbəy rayonundayıq… Təmiz dağ havasını udub, saf bulaqların suyundan içməyə gəlmişik…
“Düzyurd” çayı boyunca üzü yuxarı “Şır-şıra” şəlaləsinə doğru irəliləyirik. “Şır-şıra” şəlaləsi şəhər mərkəzinə yaxın ərazidə yerləşir. Bununla belə ora avtomobil yolu yoxdur, amma piyada qət etməli olduğumuz məsafə də elə çox deyil. Yol boyu taxta, ağac və qum torbalarından inşa edilən kiçik körpülərdən, habelə iri qaya parçalarının aralarından keçirik. Şır-şıra şəlaləsinin hündürlüyü təxminən 10-12 metrdir. Bu Qərb bölgəsinin ən hündür şəlalləsi olmasa da, zənnimcə görünüşcə ən gözəlidir…
Gələrkən sol tərəfdəki yüksəklikdə dalğalanan Azrbaycan, Türkiyə və Pakistan bayraqları diqqətimizi çəkmişdi … Burada yuxarı aparan cığır var. Bəzi yerlərdə kiçik qaya və daş parçaları, habelə torpaq sürüşsə də, ümumilikdə irəliləmək elə də çətin deyil. Burada hündürlük nə qədərdi bilmirəm, amma mənzərə möhtəşəmdir. Az əvvəl yanında dayandığımız “Şır-şıra” şəlaləsi də buradan bir başqa görünür.
Gədəbəyin Koroğlu qalası şəhər mərkəzindən təxminən 15 km aralıda Qalakənd ərazisində yerləşir. Dəniz səviyyəsindən 2 min metr yüksəklikdə yerləşir. Etiraf etmək lazımdır ki, fikizi hazırlığı olmayanlar üçün zirvəyə qalxmaq olduqca çətindir. XVI əsrə aid edilən tarixi tikili sıldırım qayalığın zirvəsində, sərt yamacda inşa edilib. Qala divarlarının eni bir metrə yaxındır. Müdafiə məqsədilə inşa edilən “Koroğlu” qalasında yeraltı yol və gizli su xəttinin də olduğu deyilir. Qala daxilində anbar da mövcuddur. Zirvədən ətraf kəndlər ovuc içindəki kimi görünür.
Gədəbəyin “visit kartı” hesab edilən abidələrdən biri də yerli sakinlərin “qanlı” adlandırdıqları bu alman mirasıdır. Daş körpü məşhur “Siemesn” şirkəti tərəfindən XIX əsrin ikinci yarısında inşa edilib. 1879-cu ildə istifadəyə verilən və Zaqafqaziyada ilk olan 28 km uzunluğundakı dəmir yolu xətti məhz buradan keçib.