台慶55丨 馬明靚湯拖手現身閃耀紅地毯 女星各出奇謀鬥性感波濤洶湧
台慶55周年重點節目《萬千星輝賀台慶》嘅紅地毯環節向來都係焦點所在，每一位藝人都盛裝打扮登場。今年紅地毯打頭陣嘅就有應屆港姐林鈺洧、許子萱、梁超怡同埋邢慧敏，緊接就有馬國明、湯洛雯以情侶檔姿態行紅地毯，佢哋仲十指緊扣拖到實，非常sweet呀！講到最近被搬屋公司曝光咗新愛巢，馬明就話事件曝光後，搬屋公司已經即刻道歉，仲解釋係因為員工好欣賞佢同靚湯，所以先會將啲相post上網同大家分享內心喜悅，馬明仲叫大家唔好諗到係搬屋公司想借佢哋嚟賣廣告呀。
黎諾懿、Tiffany劉穎鏇同樣以黑白造型現身，當中Tiffany嘅白色開衩長裙，完全特顯佢嘅長腿呀。而以桃紅晚裝登場嘅阿姐汪明荃，連髮型都襯返有桃紅highlight，阿姐仲話呢個髮型係顧及到攝影師好多時都會take半身大頭shot，咁樣就會單睇半身都會有少少特色喇！身為潮人指標嘅陳山聰，呢晚繼續行型格路線，佢話套衫係朋友特登喺巴黎搵返嚟，而拍檔胡定欣就以棕紅色長裙配金色巨型耳環登場，定欣話自己條裙係呢日先新鮮熱辣抵港。陳展鵬就同着上紫色晚裝嘅Ali李佳芯亮相，見到佢咁容光煥發，唔知係咪同近日嘅緋聞有關？Ali就解釋係個美麗誤會，仲話今次旅行係自己一個去，叫大家唔好諗太多呀。
蕭正楠同DeepV嘅Mandy黃智雯一同出場，由於Mandy嘅晚裝實在太性格，搞到阿蕭都唔敢亂望呀！魔術師Louis Yan甄澤權就同邵初、高海寧、蔣家旻同埋陳自瑤一齊登場。而《痞子殿下》嘅周嘉洛就同好拍檔陳瀅、JW王灝兒現身，兩位女士仲齊齊大騷玉背，相當吸晴。陳豪同張曦雯呢對螢幕CP一齊現身，而馬德鐘同姚子羚就選擇行型格路線，羅子溢同劉佩玥就齊齊以黑色晚裝示人。
《聲夢》嘅Aska張馳豪就同Chantel姚焯菲、Yumi鍾柔美齊齊現身，冼靖峰、詹天文、文凱婷、林智樂四位結伴行紅地毯，Gigi炎明熹同曾比特就跳住行紅地毯，非常鬼馬。《聲夢2》嘅Jasmine任暟晴、Janees黃洛妍同Sabrina趙紫諾以全白打扮示人。至於日前盛傳因為綵排而發生爭執嘅兩代港姐冠軍 宋宛穎 同 黃嘉雯，呢日齊齊以火紅打扮出現，仲異口同聲否認曾經發生爭拗，唔明外界點解會有咁嘅傳聞出現喎。
#萬千星輝賀台慶 #紅地毯 #馬國明 #湯洛雯 #聲夢傳奇 #聲夢傳奇2 #炎明熹 #曾比特 #AfterClass #宋宛穎 #黃嘉雯 #TVB #娛樂新聞 #TVB娛樂新聞台
#ENews #HKENews #香港娛樂八卦新聞 #八卦新聞
即刻Follow TVB 娛樂新聞台 Facebook專頁
/ tvbenews
登入myTV SUPER享受睇TVB自製節目7日包括娛樂新聞的免費點播
bit.ly/2TXLlM0