«Ең бірінші бақытым - Халқым менің,
Соған берем ойымның алтын кенін.
Ол бар болса, мен бармын, қор болмаймын,
Қымбатырақ алтыннан нарқым менің.
Ал екінші бақытым - Тілім менің,
Тас жүректі тіліммен тілімдедім.
Кей - кейде дүниеден түңілсем де,
Қасиетті тілімнен түңілмедім»-деп ақын Мұқағали Мақатаев жырлағандай тілге деген құрмет осындай болар.
Біздің бүгінгі кейіпкеріміз Алена Малькова Абай Құнанбайұлы, Ыбырай Алтынсарин, Мұқағали Мақатаев, Мағжан Жұмабаев сынды қазақтың ақындарының бірнеше өлеңдерін жатқа біледі.Қазіргі таңда әр салада жетістікке жетіп, жас болсада бас болып жүрген жастарымыз аз емес. Солардың бірі «Жастар жарқын болашаққа» рубрикасының кезекті кейіпкері Алена Малькова.
Алена оқушы кезінен бастап қазақ тілін жанына серік етіп, ана тілін үйренуді басты мақсат тұтты. Бүгінде «Сөйле» клубында ұстаздық етіп, қазақ тілінен дәріс беріп жүр.
«Сөйле» клубының басты мақсаты қазақ тілін үйренгісі келіп жүрген барша азаматтарға тіл үйрету. Мемлекеттік тілдің мәртебесін асқақтату.
Ана тілін үйренуге жастар мен қоса үлкен апа-ағаларымыз, ата-әжелеріміз де келетін көрінеді.
Сабақ беру барысында түрлі әдіс-тәсілдері қолданылады. Тіпті сабақ қызықты өту үшін, театр, көрмелерге де барып тұратынын мақтанышпен айтып отыр.
«Құрметті жастар, сіздерді қазақ тілін үйренуге шақырамын. Өйткені, қазақ тілі-Қазақстан республикасы тәуелсіздігінің басты белгісі деп білемін. Тілі жоғалған ұлт, өзі де жоғалады. Өйткені тіл-ол басты қарым-қатынас құралы. Мемлекеттік тілді білу ол біздің міндетіміз әрі парызымыз. Ол отансүйгіштіктің белгісі»,- дейді кейіпкеріміз Алена Малькова.
Тіл үйренемін дейтін азаматтарға «Сөйле» клубының есігі әрдайым ашық.