Ауқымды әлеуметтік шара аудан тарихында бұрын-сонды болмаған. Ленгер қаласында 5 қабатты 8 үй салынып, тұрғындарға тапсырылды.
Ленгер қаласының бас жоспары бойынша жаңа мөлтек аудан қаланың орталығына айналуы тиіс. Мұнда негізінен көпқабатты үйлер салынатын болады. Пайдалануға берілген алғашқы 8 үйді салуға облыстық бюджеттен 2 миллиард 735 миллион теңге бөлінген болатын. 29 264 шаршы метр болатын қолжетімді тұрғын үйлерді аудандағы кезекте тұрған азаматтар алды. Олардың ішінде әлеуметтік қолдауды қажет ететін топ өкілдері мен әскерилер, бюджеттік мекеме қызметкерлері бар. Баспаналы болғандардың бірі - көпбалалы ана Жанар Әліпбаева.
Жанар Әліпбаева, Ленгер қаласының тұрғыны:
- Біз анамызбен үлкен отбасы болып тұрдық. Бес балалы болғаннан кейін үй беріліп, қуанышымызда шек болмай жатыр. Үйді 7 жыл күттік.
Жаңа үйдің құрылысына соңғы технологиялар қолданылған. Ол коммуналдық шығынды азайтуға мүмкіндік береді. Әр пәтерге жеке жылу есептегіш құралы орнатылыпты.
Бақыт Әбішев, құрылыс компаниясының жетекшісі:
- Әр пәтердің тұрғыны жылудың сапасын өздері қадағалап, керегінше пайдалануына болады.
Жаңа мөлтек ауданда тағы екі көпқабатты үйдің құрылысы бітуге жақын. Қала осы бағытта дамитын болған соң, инфрақұрылым болашаққа есептеліп, тартылып жатыр. Келесі жылы мұнда тағы 10 үйдің құрылысы басталады.
Бұхарбай Парманов, Төле би ауданының әкімі:
- Жаңа аумаққа көшіру жөнінде жобалардың бәрін жасадық. 2020 жылға дейін осы жерде тағы 25 үйдің құрылысын салуды жоспарлап отырмыз.
Сол кезде ауданда кезекте тұрғандардың қатары 3 есеге азаятын болады.
Авторлары: Әбдез Рахманұлы, Нұрмахан Мұсатов