Tölzer Stadtkapelle - Tölzer Schützenmarsch 2007
(mit Bildern aus Bad Tölz
Zugehöriger Text:
Im schönen Isartal schallt muntrer Büchsnknall,
in Tölz, da is a Schiassats heut, des gfreit uns allamal.
Drum greifts den Stutzn o, wer zieln und treffa ko,
mit frischn Muat, an Strauss am Huat,
so liabts des Schütznbluat.
Zuerst geht auf Post man nei und feucht´ si d´Gurgl ei,
du glaubst mas net, wia schneidi macht a so a Glasl Wein,
dann richt ma si halt z´samm, nimmt alls was ma muass habn,
und fertig is, als wiar im Flug, da schönste Schütznzug.
Frisch werd, und stramm im Takt, de Gschicht dann glei opackt,
d´Musikantn fest voro, da blast a jeda, was er ko!
Alles ja juche schreit vor lauta Lustbarkeit,
dulje, dulje, dulje, dulje, es is a wahre Freud´.
Aba schaugts dort an Kreana Bäck, der nahm gern ´s Erste weg,
da Schmozer Sepp vom Tegernsee is rübakemmar aa, o weh,
Dort steht da Kolberbräu, da Karl is aa dabei,
d´Zieler mit´n rotn Gwand - de schrein, es is a wahre Schand!
Ra danaum. Isartal, du bist mei Freud,
da geht ma ´s Herz auf mächtig weit,
wann i in de Berg neischau,
de all mi grüassn freundli blau!
O, du, mein schönes Tölz
mit deinem Berg, mit deinem G´hölz!
Ja, i moan, es kunnt nix Schöners gebn,
als da herin zu lebn im Isartal, Isartal.
Aba froh is da Tölzer Gmüat, hat gern a lustigs Liad,
schneidig san d´Buamar all im schönen Isartal,
Deandal wia Milch und Bluat, san aa de Buam so guat.
Konn gwiss nix Schöners gebn als ´s Tölzer Lebn!
Aba frisch is da Tölzer Schütz, er trifft ja wia da Blitz,
mittn ins Schwarze nei, des werd wohl lusti sei,
oda er is so frei, schiasst an da Scheibn vorbei,
des kummt von gar nix her, als von sein´m Gwehr!
Jetzt is das Schiassn aus, da Zug geht lusti z´Haus,
denn auf da Post, da gibts heut no an sackrisch guatn Schmaus.
D´Preisträger mit da Fahn, de steign ganz stolz voran:
"Schaugts, Madal, o, was i alls ko, waar i net da rechte Mo?"
Ja, so a Schiassats is a rare Sach ganz gwiss,
drum san ma lusti und fidel und macha allahand Krawall.
"Trinkts, Buama, trinkts mit Gwalt, vosaamt is ebbas bald!
So Schützn, als wia heut, juche, de san ma net allezeit!"
Halli, hallo!