Табиғатты аялау. Бұл ұғымның мәнісі тереңде жатыр: қоқысты шашпау, далада от жақпау, бей-берекет ағаш кеспеу, тағысын тағы. Экомәдениет жайлы тәрбиені адамға бала кезден сіңіру қажет дейді педагогтар. Сонда осы турасында таным-түйсігі мол азамат қалыптасады. Бұл тақырып бүгін балабақша тәрбиешілерінің басын қосқан облыстық семинарға арқау болды. Ғалия Сәрсекеева "Айгөлек" бөбекжай-бақшасында әдіскер болып еңбек етеді. Білікті маманның айтуынша, бүлдіршіндерге пластикті қайта кәдеге жарату бойынша жиі айтылады екен.