Түркістан облысының су басқан ауылдарында төтенше жағдай жариялануы мүмкін. Себебі, аймақта тасқын қаупі әлі де сейілмей тұр. Бұл туралы елдің төтенше жағдайлар министрі Юрий Ильин мәлімдеді. Оның айтуынша, қазір жаңбыр тоқтағанымен, сай-саладан қашқан су жұртты әбден әбігерге салған. Оның үстіне синоптиктер де демалыс күндері таулы аймақтарда жаңбыр мен қар жаууы ықтимал деп хабарлаған. Осыны ескерген төтеншеліктер селдің алдын алу үшін күндіз-түні кезекшілікке тұрып қамданып жатыр. Ал, баспаналарын су басқан тұрғындарға келген залалды бағалау үшін арнайы комиссия құрылды. Олар әр үйді аралап, шығынды есептейтін болады.
Екі тәуліктен бері су астында қалған Түркістан облысындағы ауылдардың қазіргі көрінісі осы. Еріген қар мен жаңбыр суынан Арыс қаласы арқылы өтетін Қабылсай арнасы толып қалған. Қазір қаладағы бір үйдің шаңырағы опырылып ортасына түскен. Төтеншеліктер де сай-саладан аққан суды бөгеп, аулалардағы суды сорғызып үлгере алмай жатыр. Оларға Шымкент қаласының қызметкерлері мен сарбаздары көмекке келген. Ал, үйлері су астында қалып, дүние-мүлкі бүлінген тұрғындар қазір жыларман күйде. Бабайқорған ауылының тұрғыны Қажыбай Әбединов
ҚАЖЫБАЙ ӘБЕДИНОВ, Бабайқорған ауылының тұрғыны:
- Қыстық жинаған жем-шөптің барлығы ағып кетті. Бір-екі уақ мал ақты. Құтқара алмай қалдық. Қора-қопсының барлығы жарамсыз болып қалды.
Ал Үлгілі ауылындағы жалғызбасты ана Тәттігүл Сағындықованың жағдайы тым мүшкіл. Келіншек қазір үйіне де кіре алмай қалған. Көлкіген судан баспанасының қабырғалары сыр беріп, құлауға шақ қалды дейді. Сондықтан, ауылдағы медресенің аядай бір бөлмесіне жайғасыпты. Айтуынша, үйге ағын су лап бергенде ес жыйып үлгермей, сыртқа қашып шыққан. Дәріге сақтаған елу мың теңгем, үйдегі бар мүлік, қорадағы мал азығы мен бірер тонна көмірім де суға кетті дейді.
ТӘТТІГҮЛ САҒЫНДЫҚОВА, Үлгілі ауылының тұрғыны:
- Ана бар қысқы жылы киімнің барлығы қалды. Ыдыс-аяқ, мүліктің барлығы қалды. Анау сарайханам жаңағы, ағашханам, анау-мынау тұратын заттың барлығын басып қалған.
Созақ ауданының бөктерінде орналасқан Шолаққорған, Жартытөбе ауылдарында да жағдай қиын. Тасқын жол бойынан екі адам отырған жеңіл көлікті ағызып әкеткен. Қайта төтеншеліктер құтқарып, аман қалған. Ал, өңірде жүрген Төтенше жағдайлар министрі Ирий Ильин бүгін су басқан ауылдарды аралап көрді. Ол Шардара су қоймасында былтырғыдан 1 миллиард текше метр судың артық екенін айтты. Қызылорда облысында Сырдария өзені суынан келетін қауіп те жоқ емес деді.
ЮРИЙ ИЛЬИН, ҚР Төтенше жағдайлар министрі:
- Су кірген үйлерді аралап көріп жатырмыз. Шығын келген тұрғындарға жергілікті бюджеттен қаржы бөлініп, үйлерін қалыпқа келтіру үшін нақты су басқан ауылдарға қатысты төтенше жағдай жариялау мүмкіндігін қарастырамыз.
Сондай-ақ, министр аймақта арналары толған өзендер мен Шардара су қоймасының су деңгейін бақылауға алатынын айтты. Ал, кеше қауіпсіз жерге көшірілген тұрғындардың кейбірі бүгін үйлеріне орала бастады.
.
.
.
.
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал