Рет қаралды 2,315
Тараздағы ең үлкен «Ұлы дала» шағын ауданы тек көлемімен емес, шағымымен де көш бастап тұр. Жоспары мың құбылған аймақтың мәселесі мың батпан. Бүгінде 15 мыңдай адам қоныстанып үлгерген аудан күллі игіліктен ада. Ең қажет деген әлеуметтік нысандардан жұрдай. Тек тұрғын үйлерден тұратын шағын ауданда ең құрығында мектеп те, балабақша да жоқ.
«Ұлы дала» аталған аудан әзірге мәселесінің молдығымен ұлы, түк жоғымен дала. Әр әкімнің тұсында жоспары мың құбылған аудан бүгінде бей-берекеттің ордасына айналған. Басталған іс орта жолда тасталған.
Жолы жоқ болса да бұл аудан бордюрге бай. Бірақ бұған кеткен қаржы текке кеткендей. Өйткені қазіргі жоспар бойынша жол бағыттары өзгеріп, үстіне үй салынып кеткен. Қайда қарасаң құрылыс, алайда 15 мыңдай адам қоныстанып үлгерген шағын ауданда бір де бір әлеуметтік нысан жоқ. Бар игіліктен жұрдай жұрт бұл ауданның жоспарын кім түзген дейді.
ЖОМАРТ ЖҮЗЕЕВ, Тараз қаласының тұрғыны:
- Мына жерде 70-80 үй бар. Былай қарасаң 70-80 ауыл деген сөз. Әй ең бірінші мектеп болу керек қой. Ал енді бұл жерде мектеп жоқ пәленбай ауыл тұрады. Ал енді мына Кированың аяғында бір үй жоқ, бір дәретхана жоқ. Бірақ мектеп тұр.
Жібі түзу жолы жоқ, жеткілікті суы жоқ, жылуы ол жоқ, қоғамдық көлік тағы жоқ, бір уақ бой сергітер аула жоқ, саябақ түгіл бір тал жоқ. Жоқтан құралған тізімді күн айтып тоқтаусыз толтыра беруге болады. Бар мәселенің бастауы әу бастағы жоспардың жоспарсыз өзгеруінде екен. Осылайша мың батпан мәселе жамала-жамала жаңа әкімге аманатқа өтеді. Оны жақында ғана тағайындалған әкім мойындайды.
БАҚЫТЖАН ОРЫНБЕКОВ, Тараз қаласының әкімі:
- Бастапқы жобадан ауытқу болғандықтан оның ішінде жылу, су, бүгінгі таңда мына көлемді қамтамасыз ете алмай отыр. Бұл бүгін туылған проблема емес. Өкінішке орай құрылыс жұмыстары алға кеткен мына жүйе желілері кеңейту мәселелері қалып қойған.
Әу бастағы жоспар бойынша мұнда небәрі 60 көп қабатты тұрғын үй болуы тиіс. Бүгінде оның саны 145-ке жеткен. Ендігі жерде оларды инфроқұрылыммен қамтамасыз етуге бұрынғы желінің шамасы жетпейді. Сондықтан, қазір құбырлар қайта қазылып кеңейтілуде. Жуырда ғана тізгін алған әкім бар мәселені шешу үшін «Ұлы далаға» жаңадан жоспар құратынын жеткізді. Зерттеп-зерделеп алдағы екі айда нақты шешім қабылдайтынын айтты. Жұрт осы жоспар соңғысы болса екен деп тілейді.
.
.
.
.
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Информбюро #Ақиқатын_Айтайық #ИнформбюроЖаңалықтары #БүгінгіЖаңалықтар #БастыЖаңалықтар